Wir Johannes postulerter und bestedigter Abt, Wilhelmus Prior und gantze Convent des Klosters Sancti Michaelis binnen Hildensheim bekennen offentlich in und mit diesem Brieffe vor unß, unsere Nachkhomen und idermenniglich, nachdem weilant unser Vorfhar Abt Johannes und Convent Anno der Wenigerjartzall zweiundfunfftzich, mandages in denn heiligen Osteren, nach Christi unsers liebenn Herenn Geburdt vonn dem ersamen und vorsichtigen Jost Wildefuer, Hanses Borgermesters zeliger Sone, einhundertfunffundzwantzich gute fulwichtige Rheinsche Goldtgulden Hovetsumma zu fuller Genoge ufgeburt und empfangenn und davor ihme Josten Wildefuer sechszehen Jar langk unseren Hoff sampt desselbigenn angehorigenn sechszehen Morgen Landes im Drispensteder Velde gelegenn uff eine Wederlose in seine habende gebrauchende Wehr verkaufft und eingedann, wi solches Brieff und Siegell klarlich vermeldenn und auffuren, wann aber vonn solchen sechtzehen Jaren nhunmehr in die viertzehen verflossenn und unß nich zur Zeit angelegenn, unseren Hoff sampt gemelter unser angehorigen Lenderie ahn unß zu loisenn, demnach haben wir gemelten Joste Wildefuer und seinen Erben gedachten unseren Hoff und Lenderie zu den zwein Jaren, so ehr alrede daranne zu beredende, noch viertzehen Jar langk widerumb uffs neu eingethann, also das ehr vonn scherkunfftigem Petri ad Cathedram an tzu rechenen ahn sulchem unserem Hove und Lenderie uber alles sechszehen Jar soll zu beredende habenn. Wanner aber dieselbigenn wollenn verfloissenn sein, alßdann sollen und wollen wier unß mit der Losekundigunge und Entrichtunge des Hovetsumma und Wederlose nach dem hellenn Bogkstave unsers wolgemelten Vorfharen Abt Johansenn außgegeben Hovetvorschrebunge, so Jost Wildefuer noch bei sich behalten, entrichten und schigkenn, darjegen sich denne Jost Wildefuer und sine Erbenn nich sollenn ader wollenn uffhaltenn, getreulich und ungeferlich. Dieses in Urkunde habenn wir unser Ebdie und Convents Ingesegele wissentlich ahn diesen Brieff lassen hengenn, gegebenn nach Christi unsers Heren Gebordt im Funftzehenhundersten sechsundsechtzigesten Jaren, den funftzehenden Februarii.||