Wir Johannes Abtt, Wilhelmus Prior und gantze Convent des Closters Sancti Michaelis in Hildenscheim Ordinis Sancti Benedicti bekennen und thun kundt offentlich in und mit diesem Breife vor unß, unsere Nachkhomen und allermenniglichen, das wir dem ersamen und beschedenn Mester Thomas vann Busche dem olderen, seinen Erbenn, Erbnemen ader dem Holder dieses Breiffes mit seinem effte irem guten Wissen und Willenn rechter, warer, wissentlicher, offenbarer unnd bekantlicher Schuldt schuldich unnd pflichtich sein hundert gute fulwichtige Reinsche Goldtguldenn, gudt vonn Golde unnd Schlage, auch schwar genoch vonn Gewichte, die wir von ime zu fuller Genoge uffgebordt unnd empfangenn unnd dieselbigenn alsofordt inn unsers Closters scheinbarlichenn egenn Nutz, Fromen unnd Beste unnd sunderlich zu Erbauwinge des neuwenn Rempters gekardt unnd angewendett habenn. Welche hundert gute fulwichtige Reinsche Goldtguldenn dan wir willenn unnd unsere Nachkhomenn schullenn dem gedachtenn Thomas vann Busche unnd seinenn Mitbeschreivenn allejarliches uff Osterenn die Weile diese Hauptsumma nicht abgegebenn mit funf Goldtguldenn derselbigenn Werderunge vortzinsenn. Wir habenn unß aber zu beidenn Delenn die Gewaldt unnd Macht vorbehalten, das unser einer dem anderen, welcherem das gelovett, allejerliches in denn hilligenn Dagenn zu Winachten uff gemelte hundert Goldtguldenn die Lose schrifftlichenn ader muntlichenn mach kundigenn, und wen die gescheenn, willenn wir unnd unsere Nachkhomenn schullenn dem ehrgedachten Thomas vann Busche ader seinen Mitbeschreven inn denn osterlichen heiligenn Dagenn der Losekundigunge negestfolgende sodane hundert gute fulwichtige Reinsche Goldtguldenn samptt mit funf Goldtguldenn Zinses, auch allenn hinderstelligen Zinsen, ob der welche hinter geblieven, gutlichen und woll zu dangke binnen der Altenstadt Hildenscheim unbehindert unnd umbekummert alles geistlichen ader weltlichen Gerichts effte Rechts, so albereidt erdacht ader vonn Minschenn Geschwindicheit erdacht werdenn konte, widerumb entrichten, vornugen unnd betzalenn, getreulich unnd ungeferlich. Dieses in Orkunde haben wir unser Ebdie und Convents beide Ingesegele wissentlich ahn diesen Breiff thun hengen, gegeben nach Christi unsers Heren Gebordt im Funfzehenhundersten siebenundsechtzigesten Jaren, deß dinstages in den hilligen Osterenn.||