In nomine domini amen. Anno a nativitate eiusdem Millesimo quadringentesimo nonagesimo nono, indictione secunda, die vero mercurii terciadecima mensis marcii, pontificatus sanctissimi in Christo patris et domini nostri domini Alexandri divina providencia pape sexti anno eius septimo, in mei notarii publici testiumque infrascriptorum ad hoc vocatorum et rogatorum presentia personaliter constituti religiosi patres et domini Petrus procurator et Hinricus professus monasterii sancti Michaelis in Hildensem asserientes et exponentes, quod cum inter abbatem tunc pro tempore et conventum prefati monasterii sancti Michaelis Hildensemensis ex una et Bernt Pepperkorn et patrem suum eiusque heredes partibus ex altera ex contractu emptionis et vendicionis et pacto de retrovendendo vendiderat prefato Bernt patrique suo suisque heredibus singulis annis quadraginta solidos novos Brunsviccenses eiusdem warandie in civitate Brunsviccense solvendos et currendos annorum reddituum in et ex quadam curia villicali unacum quatuor mansis situata et iacentis in villa et campis ville Ingeleve in districtu Jerxsem Halberstadensis diocesis pro prece et precio viginti marcarum Brunsviccensium eiusdem warandie ad antedictum abbatem et conventum prefati monasterii spectantia et pertinentia, prout in quadam littera desuper per abbatem et conventum prefatum sigillata, ad quam se referunt, plenius continetur et habetur. Ne ergo quisquam in jure suo pereat et in probacionibus suis ex diuturnitate temporis deficiat, eundem Bernt Pepperkornum, senem sexaginta annorum circa vel supra, prebendatum ad sanctum Leonhardum prope et extra muros Brunsviccenses Halberstadensis diocesis, ibidem presentem coram me notario publico infrascripto exhibuerunt et produxerunt, quem super prenarratis examinari et interrogari petierunt et postularunt. Qui per me notarium publicum infrasriptum examinatus et interrogatus, qui prece, precio, amore, favore, ira, odio et rancore in premissis postpositis penitus et semotis publice expresse et in veritate recognovit confessusque fuit, respondit et dixit, quod huiusmodi contractus emptionis et vendicionis fuerat per patrem suum pie defunctum cum prefatis abbate et conventu celebratus ipseque dictam litteram sigillatam apud se habuit et tenuit dictamque curiam villicalem unacum quatuor mansis predictis ex contractu emptionis et venditionis pater suus et ipse in possessione habuerunt dictumque censum quadraginta solidorum prefatis abbati et conventui dicti monasterii singulis annis ad annos septuaginta tres citra vel supra absque aliqua contradictione persolverunt et assignarunt usque ad tempus reemptionis infradicendis, illo tamen pacto adiecto, ut si contingerit patrem suum et ipsum eiusque heredes in dicta curia villicali construere domosque edificare aut cepes erigere aut alia predicte curie necessaria, extunc prefati abbas et conventus dicti monasterii, antequam huiusmodi curiam villicalem unacum quatuor mansis predictis reemere aut redimere contigerit aut veluit, extunc abbas et conventus dicti monasterii debent et volunt prout possent huiusmodi viginti marcas Brunsviccenses summe capitalis et principalis unacum structuris, edificiis et cepibus huiusmodi iuxta dictamen et rationem bonorum virorum solvere et assignare prefatis Berndt suisque heredibus, prout in dicta littera desuper sigillata plenius continetur et habetur. Demum de anno domini millesimo quadringentesimo nonagesimo tertio citra vel supra abbas et conventus monasterii sepedicti prefato Bernt et suis heredibus iuxta huiusmodi contractum sive pactum de retrovendendo litteras intimatorias reemptionis huiusmodi curiam villicalem unacum quatuor mansis predictis prefato Bernt suisque heredibus intimari fecit et procuravit, et expost prefato anno nonagesimo tertio ipso die Marci Evangeliste prefati abbas et conventus sepedicti monasterii prefato Bernt et suis heredibus huiusmodi viginti marcas Brunsviccenses summe capitalis necnon septem alias marcas Brunsviccenses cum media occasione structure et edificiorum iuxta dictamen bonorum virorum Brunsvigk in domo habitacionis cuiusdam Johannis Heysen, laici et civis Brunsviccensis, plenarie et integre ac in totum persolverunt, assignarunt et pagarunt, dictasque viginti marcas summe capitalis et septem alias marcas Brunsviccenses cum media occasione structure et edificiorum prefatus Bernt ad se recepit et sublevavit ac pro se suisque heredibus de eisdem quitavit prefatamque litteram sigillatam idem Berndt prefatis abbati et conventui monasterii sancti Michaelis predictis restituit ac reassignavit ac se plenarie et integre satisfactum de eisdem dixit et recognovit. Adiecit insuper idem Berndt, quod non alias, aliter, ultra neque alio modo pater suus et ipse heredesque sui huiusmodi curiam villicalem unacum quatuor mansis predictis ab abbate et conventu prefati monasterii sancti Michaelis in Hildensem habuerunt, fructificarunt, tenuerunt et possiderunt, ipseque Bernt de predictis viginti marcis Brunsviccensis summe capitalis et septem aliis marcis Brunsviccensis cum media sororibus suis iuxta quotam summe predicte, videlicet der Krengesschen, Rythusesschen et Lodelsschen satisfecisse et solvisse dixit, ita videlicet, quod occasione premissorum prefati abbas et conventus nulla incommoda ac dampna sustinere aut pati debeant neque eos in aliquo molestare, inquietare et perturbare directe vel indirecte quovis quesito colore vel ingenio. Super quibus omnibus et singulis premissis prefati Petrus procurator et confrater suus sibi a me notario publico infrascripto unum vel plura publicum seu publica fieri ac confici petierunt instrumentum et instrumenta. Acta fuerunt hec Brunsvigk in domo habitacionis honorabilis viri domini Henningi Morag, plebani ecclesie sancti Leonhardi prope et extra muros Brunsviccenses, sub anno, indictione, die, mense et pontificatu quibus supra, presentibus ibidem eodem domino Henningo Morag et Gherardo Pawel laico et cive Brunsviccensi, testibus ad premissa vocatis specialiter atque rogatis. ||
Et ego Ludolphus Mullere, clericus Halberstadensis diocesis, publicus imperiali auctoritate notarius, quia huiusmodi confessioni, recognitioni et attestationi omnibusque aliis et singulis premissis, dum sic ut premittitur fierent et agerentur unacum prenominatis testibus presens interfui, eaque sic fieri vidi et audivi, ideoque hoc presens publicum instrumentum manu alterius fideliter scriptum, me aliis occupatis negociis, subscripsi, publicavi et in hanc publicam formam redegi, signaque et nomine meis solitis et consuetis signavi in fidem et testimonium omnium et singulorum premissorum rogatus pariter et requisitus.||