Wy Johannes abbeth, Hermannus prior unde gantze convent des closters sunte Michael bynnen Hyldensem bekennen openbare in dussem breve vor uns unde unse nakomende, dat wy upgebort unde entfangen hebben van den werdygen heren deken unde canoniken der kerken sunte Andree in der stad Hyldensem twehundert vulwychtige Rynsche gulden. Dar vor hebben wy one verkofft verundetwyntich luttike punt, so to Hyldensem gynge synt, alle jar to gevende, als twelff punt up Johannis to myddensommer unde twelff punt to Wynachten ut unsen huseren, de wy gebouwet hebben in dem Wolde by sunte Michaelis closters unde uth alle unsen redesten guderen, unde hebben sodane twehundert gulden in unses closters nuth gekart, nemptlyken hebben wy se dem ersamen manne Gerken Pauwel, borgermeyster der stad Brunswick, weddergeven, deme wy se plychtich weren. Doch so hebben wy uns unde unsen nakomeden de macht beholden, dat wy sodane verundetwyntich punt luttiker pennynge alle jar mogen affkopen, unde wan wy dat wolden don, scholden wy dussen vorbenompten heren de lose eyn verdendeyl jars tovoren vorkundigen unde dar na upp Johannis to myddensommer edder to Wynachten one dusse vorscreven twehundert vulwychtige Rynsche gulden myt bedageden tynse weddergeven, unde wanere sodans gescheyn were, scholde dusse brefft machtlos unde unbyndende wesen. Alle dusse artykel loven wy vorbenompte abbt, prior unde convent dussen vorscrevenen heren stede unde vast to holdende, unde hebben des to wyssenheyt unse ingesegel als abbtes unde conventes wytlyken an dussem breff don hengen, unde ys gescheyn to der Hilgen Dryger Konnynge avent anno domini Dusent vyffhundert und vyfftheyn.||