Wy Hans unde Erasmus von Salder gebroder bekennen openbar in crafft dusses breves vor uns, unse erven, erffnemen unde unße fedderen Clawes und Ludolff von Salder und alßeweme, szo alße wy denn provest unde ebbedissenn und ganzen samnunghe des closters Nienwarke bynnen Goslar dre ferndell des thegeden upp der marke und dorpstede Hetelde und all ohr tobehoringe vor achtentwintich unde hundert gude vulwichtige gulden upp eyn wedderkopp rechtes kopes vorkofft hebben na inholde der vorscrivinghe darover gegeven, sinth wy bewogen thor ere goddes, Marien der hemmeskunnyne unde unser zelen zalicheit, unde geven de dre ferndell thegeden mid aller rechticheit erffliken und ewighenn denn genanthen stiffte Nienwarke bynnen Goslar, dat de closterkynder den leven god vor uns biddenn ewichlikenn, und stellen ock dusse gemelten dre ferndell thegeden in de hande unses gnedigen hern von Hildenssem, biddende syn gnade dem vaken genanten closter will szodan overgevinghe unde vorlatinghe moghe vorgunnen, nachdem wy sze vonn syn gnaden tho lene dreghenn, unde andern nemande wen dussen closter dar bescreven. Unde wy Hans unde Erasmus von Salder loven dusse genethen vorlatinge und ewighen overgevinghe stedes warhafftich unde gewis tho holden unde dat closter entheven von aller rechten ansprake. Dusses sinth thughen Johann vonn Opperhußen, Werner vonn Geithse, Theobaldus Hagenaw, Petrus Kempe, Ernestus vonn Northem unde ander loffhafftige, unde hebben des unse rechte ingeseygell nedden an dussen breff witlick heten henghen, na der geborth Christi XVc unde XVI, den dinsdag na Bonifacii gescheyen bynn Goslar. ||