In nomine domini amen. Dei gratia nos Albertus dux in Bruneswich ad perpetuam rei memoriam tenore presentium publice recognoscimus protestantes, quod conventione nobiscum inita et habita advocatiam nobis hereditario iure pertinentem super decem et octo mansis et dimidio in maiori villa Lafforde Hildensemensis dyocesis sitis, qui quidem mansi cum eorum proprietate pertinebant et pertinent ad monasterium et conventum beati Mychaelis Hildensemensis civitatis et dyocesis pro centum marcis puri argenti monasterio et conventui predictis vendidimus cum omnibus iuribus eius et attinentiis in villis, campis cultis et incultis pariterque colendis, in pratis, pascuis, silvis, viis et inviis, terris et generaliter cum omni iure et utilitate, quibus eam habuimus et possedimus, liberam et expeditam donamus et in predicti monasterii corporalem possessionem perpetuo possidendam presentibus presentamus et transferimus ob specialem venerationem et reverentiam patronorum eiusdem loci, et ut dictus conventus nostri ac parentele nostre memoriam sincerius peragat apud deum. Protestamur etiam publice et expresse colonos et cultores dictorum mansorum nullis iuribus et serviciis, nullis angariis et exactionibus tam nobis et heredibus nostris quam advocatis et aliis subditis nostris ratione advocatie predicte esse affectos nec de cetero aliquibus adstringi debere, immo ab omnibus predictis erunt immunes et erepti ac penitus absoluti, et ob hoc expresse renuntiamus pro nobis et nostris heredibus qui nunc sunt et qui quocumque iure nobis succedere poterunt dicte advocatie et hominibus et bonis ac omnibus iuribus ad eam pertinentibus, que de facto vel de iure hactenus habuimus et que essemus in posterum habituri. Si vero - quod absit - aliquis dictum monasterium ratione dicte advocatie impetere et imbrigare voluerit, nos ipsi monasterio et conventui de evictione cavere volentes obligamus et adstringimus nos et heredes nostros, quod super dicta advocatia monasterio et conventui sepedictis contra quamcumquem personam plenam et legitimam prestare et facere volumus warandiam. Huius autem rei testes sunt honesti viri Johannes de Uttesse, Ecbertus de Asseborch, Gherhardus de Gustede, Johannes et Ludolfus fratres de Honleghe, milites, Bertoldus de Honleghe notarius noster, canonicus sancti Blasii in Bruneswich, et quam plures alii fide digni. Ut autem huius advocatie prescripta venditio cum proprietate ipsius et omnibus suis iuribus et utilitatibus sicuti nos habuimus firmum et perpetuum sortiatur effectum et ut omnia et singula quemadmodum prescripta sunt a nobis et nostris heredibus qui nunc sunt et qui quocumque iure nobis succedere poterunt firma et inconvulsa serventur, presentem paginam inde conscriptam et sigilli nostri munimine roboratam predicto monasterio dedimus ad cautelam. Datum et actum anno domini Millesimo trecentesimo tertio, octavo kalendas aprilis.||