Wy olderman der gemeinheitt der Oldenstadt tho Hildeßem bekennen openbar in dussem breiffe vor unß, unse nakomen unnd alsweme, nachdeme by uns de bescheiden Andreas Finckenstein unnd Ilse syn eylige husfrauwe eyne mylde gave nach orer beider doethligem afstervende - dat gott lange fristen mothe - , inholde unnd vormoge eyner ordination von uns versegelt fundert unnd upgerichtet, unnd uns tho der behoff eynen breiff von eynem erbarnn rade der stadt Hildeßem, unsern hern, vorsegeltt, inholdende seßhundert gude fulwichtige Rinsche goltgulden hovethgeldes umbe seßunnddrittich golttgulden jerliges tinßes, in truwe vorwaringe gedan und wy ahngenhomen unnd ock desulvigen ordination in unse bewaringe holden, dar wy omhe copia togestaltt und ghegeven unnd wes darinnen vorliveth, vorschreven unnd vorfatet, dem alles ohnwedderroplich nachtokomende uns vorheten unnd vorplichtigett hebben, so vorhethen unnd vorpflichtigen uns hirmitt in jegenwordigen reverß, dath sodan ordinatio beth tho sinem unnd siner eyligen husfruwen afstervende by uns blivenn unnd nach orer beyder dode in orhe creffte unnd macht treden schall unnd alsdan vormoge dersulvigen so vorth to ewigen tiden geholden werdenn. Dewile wy nu in dersulvigen ordination ock bedacht, so vorplichten unnd vorheten wy uns hirmitt crafft dusses breiffes, dath onhen orhe jarlige bedagede renthe allejarliges, so onhen vorschreven, schullen anhe afbrock luth der hovethvorschrivinge werden entrichtet unnd guthwilligen betalet. Unnd willen forder gedachten Andreaß Finckenstein unnd Ilsen sine husfruwen gelick andern unsern gemeinen borgern in unse sunderlige schutt-scherm hirvormiddelst angenomen hebben unnd se in alle oren ahnliggenden besweringen unnd rechtmetigen sachen nach alle unserm vormoge vortreden unnd nicht vorlaten, se ock de beiden eheluden in orer friheitt ohnbeswert raustenn laten bliven unnd der fruntschop de ordination, wen se des begernde unnd von uns bidden, ohngeweigertt lesen laten. Unnd wes se oren frunden nach orem afstervende in orem testamente tokerende unnd geven werden, dath alles anhe jenige besweringe unsers stadtrechten folgen to laten, und dathsulvige testamente in oren krefften ohnverbroken holden, alles getruweliges anhe list unnd geferde. Unnd dath dath reverß geholden unnd wu vorgemeldet de ordinatio ock oren statt gewynne, des to mherem unnd grotherem geloven hebben wy olderman vorbenomt eynen erbarn radt der stadt Hildesem, unse hern, dussen reverß beneffen uns des oldermans segel an dussen breiff tho hengende ersocht unnd gebeden, dath wy ergedachte rath gedan unnd hirmitt dohn bekennen, unnd hebben des to orkunde unßer stadt ingesegel witligen ahn dussen breiff, unnd wy olderman vorbenompt der gemeine borgerschop segel beneffen eynes erbarn rades segel hirunden ahn dohn hengen, nach Cristi geborth Dusent vifhundertt negenunndvertich jar, ahn dem dage Nicolai episcopi.