Ick Sander vann Oberge dho kundt unde bekenne opentlich ihn unde mith dussem breve vor meck, myne ervhen, erffnhemen unde sunst allermenniglichen, dath ick van dem ersamen Andreas Vinkenstein, borger tho Hildensem, Ilsen siner eeligen huesfruwen ihn eynem hoepe gudtlich unde woll tho dangke entfangen unde upgeborth hebbe drehundert guder wolgewegener Rinschen goltgulden, gudt vann golde unde slage, ock swar genoech vann gewichte, de ick fordt ihn minen, miner erven unde mithbeschreven egennudt, fromen unde beste witlichen gewant unde gekart hebbe, darvor ick dem gemelten Andresen Vinkenstein, sinen erven unde mithbescreven edder dem holder dusses breves mith sinem offte orhem wetten unde guden willen eynes stedenn vasten kopes, wu de in allen rechten bestendich ist, krefftich sin schall unde mach, vor meck unde alle myne erven vorkofft hebbe unde vorkope jegenwordigen ihn crafft dusses breves achtein gude fulwichtige Rinscke goltgulden jerliges tinses twisken Michaelis unde Martini hilligen dagen, alles nha dato dusses breves allererst folgende unde so fordt allejerliges up benompten termin, de wile szodane jerlige tinse mith eynem bestendigen wedderkope nicht sin wedder affgekofft, gudtlich unde woll tho dangke ihn der Oldenstadt Hildensem geven, entrichten unde betalen willen unde schullen anhe jenigerleye insage offte vorhindernt geistlichs offte wertlichs gerichts offte rechts unde sunder alle orhen scadenn unde anhe affbrock. Unde im falle, dath ick edder mine mithbescreven sodaner achtein goltgulden Rinsckes goldes, wen de jerliges bedagt, miner gelegenheit nha alle nicht dede betalen, schullen jo gewislich de helffte alße negen goltgulden anhe insage offte behelp up tidt unde termine bovengescreven jerliges betalt werden mith rechtem gedinge unde underscheit. Ifft ick, mine erven unde mithbescreven der negen Rinscken goltgulden tintzes jerliges nicht deden betalen, sunder eyniges jars hyrannhe sumich worden, alsedenne vorplichtige ick my vor my, mine erven unde mithbescrevene Andreas Vinkensteyn, sinen erven unde mithgenanten, wen ick darumme schrifftlich edder muntlich ihn miner behusi edder jegenwordigheit van omhe darumme angemahent, inwendich veherthein dagen noch der ersten manunge tho Hildensem bynnen der Oldenstadt ihn eynne erlige gemeine herberge, de se uns antzeigen werden, mith twen reysigen perden, minem sulvest live unde eynnem reisigen knechte in tho ridende unde darsulvest eynn erbarlich frommlich inlager, wu under dem adel gewontlich hergebracht, tho holdende, dar uth dages offte nachtes, heimlich edder openbaer in keine wys nicht tho komende, idt sin denne ersten de geloviger der negen goltgulden jerliges tinses alse tho der helffte geinsliken unnde tho fulehr genoege ihn orher gewarsam up mine kost unde eventhuer mith allem bodeloen, kosten unde scaden, den se soliger sake unnde manendes halven mith manende unde dergeliken, mith vorsumenn unde vorterende jenniges gehat unde genhomen, anhe enige insage offte weddersprake, uplage edder beswerunge tho fuller genoege entricht unde betalt, idt gescege denne mith orhem wetten unde guden willen. Wy hebben uns aver tho beiden delen unde ock unsenn mithbescreven de macht unde den wilkore forbeholden unde bedinget, dath wy alle jar, wen uns edder unsen mithbescreven dath belevet unde gefellich ist, dem andern parte de lose des wedderkopes des benompten tinßes kundigen moegen, unde welckes jars wy dath dhoen willen, schulle wy dem andernn parthe den wedderkoep ihn schrifften vorkundigen ihn den Twolffdagen tho Winachten, unde denn darnha up erstfolgende Pascken ihn den veher hilligen dagen will ick Sander van Oberge edder mine erven unde mithbescreven schullen Andreßen Vinkenstein, sinen erven unde mithbenompten szodane vorgescreven drehundert gude fulwichtige Rinscke goltgulden hovetstols mith allen bedagen tinßenn, szo der noch welck hinderstellich unde vorhen unbetalt nastendich gebleven, ihn eynem hoepe ihn der Oldenstadt Hildensem gudtliken unde woll tho dancke geven, entrichten unde betalen anhe jennigerleye behelp offte vorhinderinge alles gerichts unde rechts, geistliken unde wertlikes, thosammpt allem kosten unde scaden. Im falle aver, dath dath darinnhe van my, minen ervenn unde mithbescreven jennich mangell offte vorsumenisse vorfelle, wu dath gescege, dewile ick denne eynne summa goldes by dem erbaren rade der stadt Hildenßem wan wegen des hußes Peyne uthstaende hebbe unde ick mith gedachtem rade dersulvigen betali halven etlicher mathe errich, szo will ick up den fall gemelten Andreßen Vinkenstein, sine erven unde mithgedachten dusser siner schulde hovetsuma unde tinse, wu de allenthalvenn nha dato dusses breves van my edder minen mithbescreven unbetalt erwassen konden unde mochten, tho behoeff siner geborliken betali ahn offtgenanten erbaren radt der stadt Hildenßem, onhe unde sine erven van miner uthstaende summen des huses Peyne halven (wu vorsteit) hirmith gewiset, wu ick ock egener personen vor Hinrick Dorringk unde Achill Achills, personen gemeltes rades, up dem raethuße tho Hildenßem tho merher wissenheit bekanth unde uthgesecht, solckes alles ihn orhenn stadt-denckeboke vortekent befunden, ock dem erbarn rade up deyn fall hirmith fullenkommen macht gegeven hebben, dusse geloviger Andreßen Vinkenstein, sine erven unde mithbescreven vor allen anderen negest Henni Jordens, ock borger tho Hildenßem, den ick anno negenundevertich thovorn ahn de sulvigen summen vorwißet, van der ersten betalinge, der ick van dem rade gewerdich, darnegest siner vorgerorten hovetsummen mith allen uthstaenden, bedageden unde uperwossen tinsen dangnhamich tho entrichten unde tho betalen. Woer ock van dem erbarenn rade der stadt Hildenßem dath hues Peyne, ehr dusse vorgenante betali den gelovigern entrichtet, vorandert, welckorer gestalt dath geschen konde edder mochte, unde in ander hande gelangede unde de uthstaende summa my Sander van Oberge angehorich van dem sulvigen anderen my tho entrichtende vorwißet, up den fall schullen idoch dusse geloviger Andreas Vinkenstein, sine erven unde mithgenanten in alle wege ock wu vorsteidt van der summen negest Henni Jordens vor allen anderenn entrichtet, vornoeget unde betalt werden. Dath ick Sander van Oberge also rede unde love by minen adeliken erhen, truwen waren worden unde under gudem geloven, alles getruwelich unde ungeferlich woll tho holdende mith rechter vorticht alle desjennigenn, szo ick, myne erven edder sunst jemandes hirkegen erdencken konden edder mochten, dath uns vordrechlich unde den gelovigern ahn orher betali schetlich sin konde edder mochte, nichts uthbesceden, denne ick my des alles vor my, alle mine erven unde mithbescreven in bisunderenn unde sampt gewisliken vortigen unde begeven, alse ifft itlick artikel der rechten nomptlich hyrinnhe uthgedrucketh unde van worth tho worden bescreven woren, des nummermher hirkegen up tho theinde, noch vehell weintziger tho gebrukende, sunder gensliken vortegen, begeven unde affgetreden hebben. Ihn orkunde der warheit hebbe ick Sander van Oberge vor my, mine erven unde mithbescreven myn rechte angeboren ingesegel offte pitzer witlikenn sulvest hirunder ahn dussen breiff gehengeth unde mith myner egen handt tho merher tuchenisse undergescrevenn, dath gescheen nha Christi unßes herenn geborth Dußent viffhundert darnha ihn dem eynundevefftigesten jarenn, mandages in den hilligen Osterenn. Zander von Oberghe myn handt.