Fürstbischof Hermann von Katzenellenbogen bestätigt den Tausch eines Zehnten von einem Talent aus den Gütern in Aldendhorpe, Cuodwic und Holthem für 80 Mark von Godfrid von Sconenbeke, den dieser vom Bischof von Münster zu Lehnen trug, an den Propst des Stiftes Clarholz, Friderich.
Druck: Codex Diplomomaticus Historiae Westfaliae. Urkundenbuch zur Geschichte Westfalens, 2. Teil, Nr. DLXXIX, s. 260.
In nomine sancte et indiuidue trinitatis. (H)ermannus dei gracia Monasteriensis episcopus secundus. Quoniam antiquitatis facta probabilia licet et ratione nitentia iuniorum licet cauillatio, malignantium et nodum in scirpo querentium, reuocare plerumque nititur et irritare ne que nostro tempore legitime geruntur, postmodum rescindatur, omni qua possumus cautione prouidere debemus. Nouerint igitur presentis et future etatis fideles, quod erga Claroholtensem ecclesiam bonam gerentes uoluntatem, et ubicumque possumus promouere studentes, decimam unius talenti in uillis Aldenhorpe, Cuodwic, Holthem sitam et colligendam, Fridherico ipsius loci preposito pro octoginta marcis eam comparante et Godefrido de Sconenbeke, qui eam a nobis in beneficio tenuit cum heredum suorum consensu ligitime eam resignante perpetua donatione iam dicte contulimus ecclesie. Et quia hoc rationabile factum nostrum ratum perseuerare cupimus et illibatum litterarum testimonio et sigilli nostri monimento roboramus et perpetuamus. Acta sunt hec publice anno dominice incarnationis Millesimo centesimo nongesimo nono indictione prima presentibus uiris honestis clericis et laicis Hermanno maioris ecclesie preposito, Walthero de Husteden, Wenemaro de Selfwalden, Godefrido de Lon in ecclesia maiori canonicis, Thiderico de Saltesberg, Wilhelmo de Horstmare, Hermanno de Monasterio, Thetmaro pincerna, Godescalco de Lere.