Philippus dei gracia electus ecclesie Salzburgensis, apostolice sedis legatus, universis presentem paginam inspecturis | perpetuum eius vigorem. Cum caritatis sit officium piis locis salubriter providere, nos attendentes tenuitatem reddituum monasterii in Raitenhaslach^a, cuius fundacio ad nostram spectat ecclesiam, necnon devocionem dilectorum in Christo Waltheri abbatis et tocius eiusdem monasterii conventus, qua ipsos Romane ecclesie ac nobis nostreque ecclesie affectuosis cognovimus obsequiis adherere, ecclesiam quandam nomine Perchirchen^b, quam clare memorie predecessor noster Eberhardus quondam archiepiscopus Salzburgensis ad ampliandos^c dicti monasterii redditus ipsis abbati et conventui ad prebendas eorum perpetuo deputavit, eidem deservire monasterio perpetuo, non obstante excommunicacionis vinculo, si quo idem predecessor noster tunc temporis fuerit innodatus, auctoritate presencium de consensu nostri capituli confirmamus plenam eis dantes similiter potestatem, ut ad arbitrium eorum personam ydoneam in eadem ecclesia instituere ipsis liceat prebendam sibi conpetentem perpetualiter deputando. Et in huius confirmacionis et ratihabicionis testimonium evidens presentem paginam conscribi fecimus nostrique sigilli munimine roborari. Sunt eciam huius [rei]^d testes: Ditricus et Chunradus fratres ordinis predicatorum^e, V^olricus plebanus in Mallentin archidyaconus^f iuxta Traham, magister Heinricus notarius canonicus Frisacensis^g, Chunradus comes in Wazzerburch^h, Chunradus de Goldekeⁱ, Gebhardus de Velwen^k et alii quam plures. Dat. huius in Mittersel anno domini M^o. CC^o. L^o, VI^o kal. ian., VIII indictione.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 183, S. 155-156