Ich Ekhart von Tann offen vnt tu^oen chunt allen den, die disen brief lesent oder ho^erent lesen, | daz ich^a durih got vnt durih vnser frauwen willen vnt auh durih mein vnt aller meiner vorfodern sælicheit hân gegeben der samnung vnt dem gotzhaus ze Raitenhaslach meins rehten aigens zwai gu^ot datz Chirichperch^b ze einem ewigem sælgræt vnt auh für sehzechen pfunt pfenning, die sold ich^a gelten dem ersamen apt Chu^onraten von Raitenhaslach, gar vnt gaentzleichen mit allem dem, daz dar zu^o geho^eret, versuecht vnt vnuersuecht, swi iz genant ist. Ja halt daz ditz sælgræt dester steter beleih dem gotshaus ze Raitenh(aslach) vnt nah meinem tod an chrieg vnt an all ansprahh, han ich den vorgenanten apt vnt daz gotzhaus ze Raitenh(aslach) gesætzet in nutz vnt in gewer bei meinem lemtigem leib. Vnd daz der ræd also sei vnt das ditz sælgræt beleih stæt vnt vnzebrohen vnt sicher vor ansprahh aller meiner erben, han ich dem gotzhaus ze Raitenh(aslach) ze einem waren vrchu^end gegeben disen brief versigelten mit meinem insigel. Der brief ist gegeben, do von vnseres herren gebu^ert waren tausent jar zwai hundert jar in dem vier vnt azichgistem jar, an sant Peters vnt sant Paules tach.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 397, S. 321-322