Ich u^olrich von Wispach, Offney mein haufrav^oe, Ulrich mein svn vnd alli vnser erben vergehen | offenleich an disem brief allen den, di in sehent oder ho^erent lesen, daz ich mit wolbidachtem mv^oet vnd nach meiner besten friu^ont rat dem goteshaus vnd der sammvnge ze Raitenhaslach^a han gegeben mein aigenev^o hv^oeb datz O^etmaringe ze rechtem selgret vnd auch für den schaden, den ich demselben goteshaus getan het in dem chriege ze Titmaninge, vnd han den ersamen abbt Gebharten vnd daz obengenant gotshaus der selben hv^oeb gesetzet in nvtz vnd gewer, also daz si ewichleich bei dem goteshaus sol bileiben für freiz aigen, bisu^oecht vnd vnbisu^oecht, mit allen den rechten vnd nv^otzen, di da zu^oe geho^erent, vnd wir noch vnser erben hawen fu^orbaz darauf chainerlay gewer nicht weder mit stift noch mit vogtey noch mit nachtseiden oder mit chainerlay recht, vnd sol man alliv jar meinen jartach bigen nach des ordens gewonhait. Des sind ziuge: Hainr(eich) mein bru^oeder vnd Chu^oen von Teysinge meiner swester svn, her Hertneid von Noppinge, Chunr(ad) der chamrer, Hainr(eich) von Haus, Seibot der trugsetze, Albrecht der Zappf vnd ander getriv^o leu^ot genv^oege. Daz ist geschehen nach Christes gepv^ortt vber zwelif hvndert jar vnd fümf vnd ochzich jar in dem nechsten jar darnach, an sande Matheis tage.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 405, S. 328-329