Wir bruder Chunrad der abbt von Raitenhaslach tu^en chunt vnd alle vnser samung allen den, die disen brief ansehent, das vns schu^ef Leutold der schu^ecz sein ansidel datz Walthalming durich seiner sei willen vnd jach, das stu^end fu^emf phunt vnd ein halbes Pernhart vnd Chunrad den bruedern von Pfa^effing; do jahen dieselben bruder, ir vater hiet gechauft von Leutold das vorgenant gut für aigen; der sach haben wir lang gechriegt wider ein ander. Nw zu dem lesten sampten wir vns paidenthalben in dem chloster datz Sew^en vnd Hessen * den selben chrieg * an vnsern Herren herrn Hainreich den erbergen abbt von Sewen vnd an herrn Hainreichen von Rosenhaim vnd an Hainreich von Chiemperch vnd an Fridreich von Chrispelsteten. Nu habent si geschaiden, also das Pernhart vnd sein bruder Chunrad von Pfa^effing das vorgenant gu^et datz Walthalming vns vnd vnserm gotzhaws * habent aufgegeben ga^enczleich vnd freileich für aigen vnd habent es wider bestanden von vns vnd von vnserm gotzhaws datz Raitenhaslach, also das si vnd ir erben vnserm gotzhaws sullen alle jar ewichleichein geben sechtzigt pfennig der munsse, die in der grafschaft gib vnd ga^eb sind, an sand Michelstag; tunt si des nicht, so sullen si frist haben vntz an sand Merteins tag; gebent si denne der nicht, weder tail von den zwain bruder oder sein erben ir zins nicht gebent an dem vorgenanten tag, die sullen verloren haben alle die gnad vnd ir recht, das in darauf verliehen ist; vnd das vorgenant gut datz Walthalming sol denne ga^entzleichen vnd freileichen wider vallen an vns vnd an vnser gotzhaws datz Raitenhaslach. Das disew red also sta^et beleih, geben wir in disen brief * versigelt mit vnserm insigel. Diser sache sind zeugen: vnser herre abbt Hainreich von Sewen vnd vnser subprior vnd vnser oberchelna^er pruder Potzan, pruder Wernhart vnser oberguster, pruder Fridreich, pruder Hainreich, pruder Hiltprant, pruder Ott von Ausse vnd her Perichtold der prior von Sewn, her Fridreich der guster, her Chunrad der verwesa^er von Obing, Ha^ertweich der Schreiber daselben, Fridreich von Chiemperch vnd sein sun Fridreich, Hainr(eich) Preisfuez, Otte des abts chnecht, vnd * erwarig la^ewt. Diser brief ist geben datz Raitenhaslach an sand Dionisen tag, do von vnsers herren gepu^ert waren tawsent jar zwain hundert vnd newntzich jar.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 439, S. 360-361