Ich Bernhart von Pfæffing vergich offenbar vnd tv^on chunt allen den, di disn brief sehent oder ho^erent lesen, daz ein chriech was zwischen mi^er vnd dem ersam apt von Raitenhaslach vmb daz gv^et datz Walthalming, do wart derselb chriech enschied lazzen vnd wart geschaiden, daz ich mich verzech aller ding des selbn gv^ets, vnd bestv^end ez her wider mit beschaidner red mier vnd meinen erben, also daz ich oder nah mier mein erben alle jar solt gebn hintz Raitenhaslach vierzich pfenning an sand Michels tach; tæt ich dez niht, so schold ich frist habn auf sand Marteins tach; gæb ich si denn niht, so schol daz selb gvet datz Walthalming ledichleichn vnd vreilichn gevallen an allen chriech an daz gotshaus ze Raitenhaslach; des geschach, daz ich den selbn eins versaz, da fvern di brvdere von Raitenhaslach auf dev lantreht vnd behabtn daz dikch genant gv^et ze Walthalming. Dar nach han ich Bernhart mit den pesten vnd den wægsten datz Wazzerburch erlangt nach grozzer vleg vnd pet, daz mier der vorgenant apt von Raitenhaslach vnd sein samnung habnt wider geantwurt daz gvet datz Walthalming, daz ich ez in dem reht schol habn ich vnd mein erbn, als ich ez vor han gehabt, daz ich noch oder mein erben alle jar sullen gebn vierzich pfenning an sand Michels tag. Swo wi^er daz verzikten, ich oder mein erbn, so hab wir dannoch vrist vntz an sand Marteins tag. Versæzz wi^er dann ich oder meinev chint den eins, daz wi^er in niht gæbn, so solt des næhsten tags ledich sein dem gotshaus ze Raitenhaslach daz oft genant gv^et ze Walthalming vnd sol ez wider ledichleichn angevallen an alle widerred fver vreiz vnd ledigz aign, noch enmag ich noch meinev chint fv^erbaz dehain reht dar auf habn oder jenen. Ja halt daz allez daz, daz obn geschribn ist, von mier vnd meinen erben werd behalten, so setz ich mit gvtem willen meiner erben LX pfenning gelts meins vrein aigns datz Stokchaim zu ainem fv^erpfant also, swo ich ez vberge oder dehain mein erb, daz daz selb gvet datz Stokchaim vreiz aigen sol sein an selgeræts stat des gotshaus ze Raitenhaslach, vnd han auch ez auf geselt in vnser ... ^a

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 439a, S. 361-362