Wier pru^oder Ott vnd Chvnrat van Leizze veriehen mit disem gegenburtigem prief, daz wier mit vnser lieben mu^oter vnd auch mit | andern vnsern geswistriden mit guetem willen sein gestanden van allem chrieg, den wier heten gegen dem erberen abtt Friderichen van Raidenhaslach^a vnd seinem gotshaus an allem dem guet, versueht vnd vnuersueht, datz Nevndorf^b mit sogetaner bescheidenhait, daz si vnser vordem vnd auch vnser vnd vnser geswistreit sullen gedenchen immermer hintz got. Auch der genant abtte Friderich vnd samnung habent vns ain lieb vnd ein minne getan vnd habent vns gegeben fv^omf pfunt Wienner, dar vmbe daz wier fuerbaz immermer niht alain an allem dem guet ze Nevndorf, svnder an ander allem i^er guet mit vnsern trewen iren frv^om sulen meren vnd fuedern vnd irn schaden wenden. Daz hab auch wier gelobt mit gantzen trewen auf dem alter vnser vro^vwen datz Chrems in Raidenhaslacher hof. Wan wier niht aigen insigel heten, hab wier gebeten den erberen abtte Chvnraten van Wilhering, der aller diser sache taidinger vnd ebner was, daz er alle disev vorgeschriben sache hat bestætigt mit seinem insigel an disem gegenburtigem prief. Dar vber hab auch wier gebeten hern Vlrichen van Wolfgerstorf den lantrihter, der diser sache ho^erer vnd rihter was, daz er auch durch merar vestenung diser sache an disen prief sein insigel hat gehangen. Des sint gezevg: abbte Chvnrat van Wilhering, her Alber der hofmaister van Raidenhaslach, her Chvnrat der Wienner van Raidenhaslach, her Hainrich der chælner in Raidenhaslacher hof, pruder Chvnrat der hofmaister in Wilheringer hof, Vlreich mein o^ehaim van Lengenvelde vnd ander fru^emeper vnd getrewer leut genu^og. Daz ist geschehen, do van Christes gebu^orde waren tovsent jar zwai hvndert jar nevntzich jar in dem nevnten jar, des nehsten mitichens vor o^estern.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 480, S. 397-398