Wir Ott vnd Stephan von gotes gnaden pfallentz graven ze Ryn, hertzogen ze Beiern, veriehen offenbær vnd tv^on chvnt allen den, di disen | brief sehent oder ho^erent lesen, daz wir dem geistlichen vnd dem ersamen abbt Fridereich von Raitenhaslach, siner samnvng vnd ir gothavs gegeben haben datz Halle vnsers vrein aigens zwo gantze pfanne mit allen den nv^etzen vnd den rehten, di dar zv^o geho^erent, besv^ocht vnd vnbesv^ocht, swi ez benant ist, vmb drev hvndert pfvnt vnd vmb sechtzik pfvnt Regenspvrger pfenning, der si vns verriht habent nach vnserm willen an di stet, da wir hin wolden, also daz si di selben pfanne ewichlichen haben sv^eln an twanchsal vnd an alle stîwer fv^er ledigs vnd vreies aigen, wan si deheinen chavf mv^egen noch getv^erren werben noch getv^on, da dehein twanchsal oder dehein reht avf wæren. Wir erchennen ovch den vorgenanten herren^a vnd ir gotshavse ze Raitenhaslach, daz in der selben pfanne ainiv emalen gegeben waz, von^b dem Tawerstain ze selgeræt hintz Raitenhaslach, vnd da von haben wir si dester willichlicher wider gegeben den vorverschriben herren vnd ir gotshavse ze Raitenhaslach. Vnd wan dem gotshavse ze Raitenhaslach mit den zwain gantzen pfannen di pfenning niht gæntzlich widerleit noch vergolten sint, haben wir di sache bedenthalben gesetzet an vnser getrewen Ortliben von Wald, Lvd(weig) den Grans, Reich(er) den vitztvm von der Rôt vnd an Hainr(eich) den jægermaister, daz si sich ervaren sv^eln mit einander, waz wir dem vorgenanten gotzhavse geben sv^eln des holtz datz Ettenawe, da mit in widerleit werden di vorgenanten drev hvndert pfvnt vnd sechtzik pfvnt. Vnd daz in daz selb in einem moneid avzgeriht vnd volfv^ert werd an geværd, dar vmb habent si sich in vnserem namen willichlich gebvnden vnser getrewen V^ol(reich) der trvchsætz von Hailsberch, Ekkpreht der Dravchbech, Lvd(weig) der Grans vnd Reicher der vitztvm von der Rôt vnd sint ovch borig worden, daz wir in alle di chrieg vnd di ansprache, di si an gent, swie si genant sint, allez dinges gaentzlichen avzrihtich^c sv^eln machen. Vnd daz wir in daz allez laisten vnd volfv^ern, als wir in gelobt haben, dar vmb setzen wir in vnser wismat datz Ettenawe ze einem fv^erpfande an allez geværd. Wær aber, daz wir in vnd ir gotshavse daz allez niht volfv^orten vnd bestætigten in einem moneid, als wir in geheizzen vnd gelobt haben, so sv^eln der vorgenant trvchsætz vnd der Dravchbech ze Regenspv^orch an geværd laisten, ob di monvng des abbtes vnd des conventes von Raitenhaslach da begreiffet; ist des niht, so sv^eln si mit sampt dem Grans vnd dem vitztvm von der Rôt ze Lantshv^ot in varen vnd in geyselweiz da laisten, vntz daz wir alle di Sache avzrihtich machen, als di hantvest sagt; vnd swenn daz ist, daz der ersam man brobst Meinhart von Bavmbv^orch vnd sin convent vnd di sængel willichlichen gestent von den zwain pfannen vnd ir hantvest, di si von vns dar v^eber habent, wider gebent, so sol daz vorgenant wismat ze Ettenawe mit sampt den borgen an alle Widerrede ledich sein. Vnd daz in daz allez stæt vnd vnzerbrochen belibe, dar vber haben wir in dise hantveste gegeben versigelt mit vnseren insigeln. Vnd ist daz geschehen ze Lantshv^ot, da von Christes gebv^ert waren tavsent jar, zwai hvndert jar in dem newen vnd newentzigistem jar, des næchsten tags nach dem svnnwenten tag.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 481, S. 398-400