Ich Ekhart purger ze Ditmanning^a verich offerbar vnd tu^oen chund allen den, die disen brief lesent oder ho^erent | lesen, daz ich mein vreiz vnd ledigs aigen datz Chrægling^b han gegeben herrn Hainr(eich) dem guster vnd dem gotzhaus ze Raitenhaslach vmb zehent pfunt Saltzburger, also daz daz gotzhaus datz Raitenhaslach daz selb gu^ot datz Chrægling^b immer mer sol haben vnd besitzen fu^er vreiz vnd ledigs aigen an all ansprahe vnd an allen chriech. Ja halt daz diser chauf dester stæter beleih vnd daz gotzhaus dester sicher sei für alle ansprache dez selben gu^otez, da v^eber setz ich dem selbem gotzhaus ze Raitenhaslach mein vnuerchummertz haus halbs datz Titmanning, den^c cheller halben vnd^d halbs haus, ze einem rehten fu^erpfant, daz ich dez selben gu^otz gewær sei, als reht ist gemainleichen in der grafschaft^e. Da v^eber vergih ich Ekhart, daz der vorgenant guster vnd daz gotzhaus ze Raitenhaslach habent vier pfunt auf dem selbem halbem tail dez hauss, daz ir fu^erpfant ist^c, also daz ich alle jar dem guster ze Raitenh(aslach), swer der ist, ob her Hainr(eich) niht enwær, daz ich dem selbem guster sol geben ain halb pfunt an sand Michels tach oder, swenn ich daz verzichte, daz ich iz niht gæb, so sol der guster daz selb halb pfunt slahen auf dev vier pfunt, daz daz hapt^f gu^ot ist. Vnd daz daz als^d also stæt beleih vnd der red aller ding also sei, da v^eber so han ich Ekhart erworfen, daz diser brief ist versigelt vnd bestætigt, wan ich niht aigens insigels han, mit hern Hainreiches insigel von Nopping des purchgrauen ze Titmanning vnd auh mit der stat insigel ze einem waren vrchu^ent. Diser sahh sint gezevch: her Hainr(eich) von Nopping mit seinem insigel, Ru^opreht von Imzing, H., Ch., Ot, Frid(reich) die Lampes, Fr(idreich) der Chrispelsteter, Vl(reich) der Lampotinger, Martern datz Titmanning, Wernhart der Zu^ochswert, Fr(idreich) der Spitzer, Vl(reich) der Mu^elhaimer, Fr(idreich) der Vihscher, H(ainreich) der Smerbech. Der brief ist gegeben datz Titmanning dez jarez, do von Christez geburt waren tausent jar zwai hundert jar in dem nevn vnd nevnzichgisten jar an sand Gilgen tach.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 483, S. 401-402