Ich Nycolay von Amprang tu^oen chunt allen den, die disen brief lesent oder horent, daz | ich allez daz reht, daz mich vnd mein mu^oem Leukart die Schonsteterinn angehört von rehter aigenschaft, swi daz genant ist, an den aigen datz Wizentzhart vnd ze Ertgru^ob, besuechot vnd vnbeschuechot, han gegeben vnser frauwen vnd dem ersam apt Vlreihen vnd seinen gotzhaus ze Raitenhaslach ze rehten selgræt fu^er vreiz vnd ledigs aigen vnd pint mich^a dar zu^o, swaz dem vorgenantem gotzhaus chrieg oder ansprach aufgesteunden oder angiengen von meiner mu^emen Leukarten oder von dhainem ir erben, daz ich daz auz rihtich mache vnd ze ledigen sol dem gotzhaus an allen schaden, vnd wil auh dez selben aigens dez gotzhaus herr vnd gewer sein, allez ich von reht sol sein meins sælgrætz fu^er alle ansprache. Da wider hat mir der ersam apt Vlr(eih) vnd sein sammung geben bru^oderschaft vnd tail aller der guten ding, die vnserm herren^a ewichleichen werdent erpoten, vnd habent mir gelopt, swenn daz ist, daz got v^eber mich oder v^eber mein hausfrauwen||
gepæut, daz si vns raichen su^ellen, swo daz geschiht in ainer tagwait, vnd su^ellen vns der erd enpfelhen. Vnd daz daz alles^b samt also stæt beleih vnd vnzebrochen, gib ich disen prief versigelten mit meinem insigel ze ainem waren vrchu^end. Diser||
sache sint gezeug: bru^oder vnd mu^enich herr Fr(idreich) der chamerer, her Hainr(eich) von Matzse^c, Ch(unrat) der Vogel, Ainweich von Wazzerburch^d, Gebh(art) der Chlapp^e, her Lienhart^f, her Vlr(eih) der pfarrer von Halsbach^g vnd her Vlr(eih) sein verweser; vnd auh Vlr(eih) von Hallerprvkk^h, H(ainreich) der Smerbech, H(ainreich) der Gwikker, Ortel des aptz kneht, Tanchwart dez Amprangers kneht, Fr(idreich)ⁱ der Darm vnd ander erbig gezeug genu^oech. Der brief ist geben ze Raitenh(aslach) dez jarez, do von^k vnsers herren^k geburt waren dreuzehen hundert jar vnd in dem dritten jar dar nah, dez næhsten erigtags nah sand Georin tach.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 507, S. 423-424