Ich Vlreich der Tanner purger von Mu^eldorf vergih vnd tu^oen chunt allen den, die disen prief lesent oder ho^erent lesen, daz ich vnd Diemu^od mein | hausfrauw^e mit gu^oten willen vnd wissen vnserr chint Chu^onratz, Margareten vnd Preiden mein drei ho^ef datz Polling, die ich fu^er ledigs aigen hæt gechaufet von herm Ortlieb von Wald, dez reht aigen sie waren, vnd die ich mein herren von Salzburch auf hæt geben ze rehten aigen vnd si her wider enpfie ze rehten lehen, han verchauft dem edeln vnd dem beschaiden ritter herm Ludweich dem Grans vmb fu^emf vnd ohzich pfunt Regenspurger pfenning, vnd wan der selb her Ludweich der Grans die selb ho^ef datz Polling hat geben vnser frauwen vnd dem gotzhaus ze Raitenhaslach an lediges^a aigen stat, wan er die aigenschaft von meinen herren von Salzburch gewnnen hat, die ich im willichen hæt gegeben. Dar vmb gib ich vnd mein hausfrauw^e Diemu^ot vnd vnser vorgenantev chint dem ersam apt Vlreichen vnd vnser frauwen vnd dem gotzhaus ze Raitenh(aslach) disen prief versigelten mit meinen insigel ze einem waren vnd ewigem vrchu^ent, daz wir nimer mer ewichleich dhain reht, ansprah noh vingerzaig nah den vorgenanten ho^efen datz Polling su^eln oder mu^egen haben oder gewinnen, wan si der Grans ze rehten selgræt hat geben vnser frauwen vnd dem gotzhaus ze Raitenhaslach. Dez sint zeug: her prior Ainweich von Wazzerburch^b, her Frid(reich) der chammerer, VI(reich) von Mu^eldorf, Ch(unrat) der Gall, Ekk, Andree sin bru^oder, Vl(reich) der Winperger, Ch(unrat) Rudolfs sun, O^ertel, Wilham, dez apts chneht, Ch(unrat) von Oberhouen vnd ander erwerig zeug genu^oech. Der prief ist geben datz Mu^eldorf, do von Christez^c burt waren dreuzehen hundert jar vnd in dem vierdem jar dar nah, an sant Veitez tach.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 521, S. 437