Ich Ortlieb von Wald tv^on chvnt allen den, di disen bri^ef ansehent oder ho^erent lesen, daz ich V^olrichen | dem Tannær, bvrger von Mv^eldorf, drei ho^ef ze chavffen gab datz Polling fv^er reht aigen vnd verzech mich der ich vnd mein havsfrawen vnd mein erben; di selben ho^ef hat der vor genant Vlr(ich) der Tannær herrn Lvd(weich) dem Grans ze chavfen gegeben, vnd der selb Grans hat di selben vorgenanten ho^ef datz Polling vnser frawen hintz Raitenhaslach gegeben vnd der samnvng fv^er reht aigen ze ainem ewigen sælgeræt im vnd seinen vorvodern. Vnd dvrch der lieb, dev ich hintz vnser frawen han vnd zv dem chloster ze Raitenhaslach vnd dvrch der lieb vnd frevnschaft willen, di ich han zv herrn Lvd(weich) dem Grans, han ich meinen willen vnd mein gvnst da zv^o gegeben, daz der vorgenant Tannær di drei ho^ef datz Polling herrn Lvd(weich) dem Grans vnd dem gotshavs ze Raitenhaslach ze chavffen hat gegeben, vnd verzeich mich der fv^er mich, fv^er mein havsfrawen vnd fv^er alle mein erben, daz wir fv^erbaz nach den vorgenanten ho^efen datz Polling dehain ansprach sv^eln haben. Daz daz dem chloster ze Raitenhaslach vnd der samnvng da selben stæt vnd vnzerbrochen beleib, gib ich in disen bri^ef mit meinem insigel versigelt, vnd diser sache sint zevg: di herren ze Raitenhaslach her Ilsvnch der prior, her Chvnr(at) der chelnær, her Hainr(ich) der chastenær, her Ort (lieb), her Gebhard der Chalb vnd her Hainr(ich) der Hv^otær; dar nach Chvnr(at) der Tæchinger von Lentzesperg^a, Hainr(ich) der Pv^ochpech^b, Chvnr(at) von Talhaim, Christan von Chno^esing vnd Chvnr(at) der Ahmanger. Der brif ist gegeben, da von Christ geburt waren tavsent jar drev hvndert jar vnd in dem vi^erden jar, an dem vreitag vor sand V^olreichs tag.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 522, S. 438