Ich Reicher vitztu^om von der Rot^a vergih offenbar, daz ich durih got vnd vnserr frauwen willen vnd durih meiner | sel hail vnd sæld vnd allen meinen voruodern ze hilf vnd ze trost han geben meins vrein vnd lediges aigens datz gu^ot datz Protmansfurt vnd mein gu^ot datz Teufstat vnser frauwen vnd dem gotzhaus ze Raitenhaslach ze rehtem sælgraet fu^er vreiz vnd ledigs aigen ewichleichen ze besitzen mit allem, daz da zu^o geho^ert, besu^oechst vnd vnbeschu^oechst, swi iz genant ist, vnd zehen pfunt pfenning Regensburger, di han ich auh dem ersam apt Vlreichen ze Raitenhaslach gegeben, daz er da mit chauf ein pfunt geltz zu dem vorgenanten gotzhaus ze Raitenhaslach, also mit der beschaiden ræd, daz man aller jerchleich an meinen jartach der sammung ze Raitenhaslach sol geben vihsch, wein vnd semeln vnd daz man ewichleich vor sand Stepfans alter in dem mu^enster sol haben ein lieht, daz durih die naht prinn, vnd alle tag sol auf dem selb alter ein mess gesprochen werden; auer swehlich jar daz niht wirt behalten, daz selb jar sol aller der gelt vnd nuhtz, der von den gu^oten wirt, werden^b geben ir maister vnd der sammung hintz Salmansweiler, als oft vnd daz gescheh. Idoh all die weil vnd ich leb, sol der sammung der dienst geben werden dez næhst mæntachs nah sand Georin tach an meins vater jartach Wernhartz, vnd sol auh gedaht werden Hailweigen mein mu^oter vnd Chu^onratz mein hausfrauwen vater mit der vigili vnd mit den messen. Vnd daz ditz selgræt stet vnd vnzeprochen^c ewichleich beleih, da v^eber gib ich Reicher der vitztu^om dem gotzhaus ze Raitenhaslach disen prief versigelten mit meinem insigel ze einem waren vrchu^end. Diser sache vnd selgretz sint zeug: her Chunrat der Trenbech, Ortneit der Tuntz, Frid(reich) der Sigenhaimer, her H(ainreich) der Harzchiricher, Wernhart der Visler, Wo^eluel von Geinchouen, Ditmar der Runtinger, Marichart der Morohtinger^d, Wo^eluel der Leubel, Ch(unrat) vnd H(ainreich) von Heltenperg vnd ander erwerig zeug genu^oech. Der prief ist geben datz Messing, do von vnsers herren geburt waren drevzehen hundert jar vnd in dem fümften darnach, dez pfintags^e in der heiligen oster wochen.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 536, S. 451-452