Ich Chunrat rihter von O^eting^a vnd mit mir her Sybot der Mitterchircher, maister Hainreich von O^eting^b, I Geiselperger, her Hainr(eich) der Pahner rihter ze Purchusen^c, her Eberhart der Chalp von Purchusen^c, fumf erwærig riter meiner herren der fursten von Baiern, offen vnd tu^on chunt alle den, di disen prief sehent oder lesen horent, das ein chrieg was zwischen herren Ortlibs von Wald vnd des^d æpts vnd gotshaus vnser frawen ze Raitenhaslach vmb den Prantwert pi der Altz gegen Schutzing vber, mit dem das vorgenant gotshaus Raitenhasl(ach) erst gestift was vnd hundert jar vnd mer an allen chrieg in nutze vnd in gwer inne gehabt het, des her Ortlib von Wald das gotshaus an reht entwert het vnd mit gewalt an alles reht wol sehzehen jar inne het. Des cham is dar zv, das her Ortl(ib) von Wald hintze Rom varen wolt für sein su^ent, das der erwærig apt Gebhart mit der samnung in ermonten vmb den Prantwert, als ferre, das her Or(tlib) schuef mit seinem rihter dem Pu^ohpechen vnd im sein selbs voln gewalt gab ze gwinn vnd ze flu^est, das mon auf den Prantwert mit dem reht ein Weisung haben schult mit den næhsten vnd gewegsten vnd den pesten, di dar vmb gesessen wærn, vnd swem di den Prantwert sagten mit ir aid vor dem reht, des schult er sein. Des wart vor mir Chunr(at) dem rihter von O^eting vnd vor vns^e fumf vorgenanten ritern vor dem reht pi dem aid der Prantwert dem gotshaus Raitenh(aslach) gesagt von Hainr(eich) von Mitterhausen, Wernharten von Stegen, Vlr(eichen) in Poumgarten, Vlschalich von Puesing, H(ainreich) von Ehmuting mitterlehner, Ekken von Schutzing, Ditmaren am Veld, Vlr(eichen) von Altzperg, vnd sint das di næhsten vnd di pesten, di dar vmb gesessen sint. Der sahh vorsprech was des apts Gerunch der chamerær von O^eting vnd anweiser Chunrat der Talweger gegen dem Pu^ohpechen den rihter vnd dem Alchigner, herren Ortlibs probst. Diser sahh sint auh zevg: her Ot von Viehausen, Ch(unrat) der chastner, der Winner von Oting, Alber der Pharrchircher^f, Seifrid der scherig, Fridl der schefman, Perhtolt vnd Gerhart von Ehmuting, H(ainreich) des Prunner su^on, Frid(reich) der Talweger, Liebhart des Plumberger su^on, Walchu^on der Stempher, H(ainreich) der scherig von Moring, H(ainreich) der forster, Wernhart der forster, F(ridreich) der Darm, H(ainreich) der Tren vnd ander pider lævt mer, di pi dem reht alle warn. Dar vber zv æinem ewigen vrchunt diser Weisung vnd sahhe han ich Chunr(at) der rihter von Oting mit samt den vorgenanten ritern disen prif verinsigelten mit vnsern insigel. Der prief ist geschriben vnd di sahh ist geschehen anno domini M^o. CCC nono, des vreitags vor mittern vasten.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 554, S. 468-469