Ich Fridreich von Torring^a erchenne das vnd offen es mit disem brief, | das ich vnreht geweist was vmb di zwo hu^ob ze Altentorring vnd ze Perchaim, di dev Seifridswurerinn von den herren vnd dem gotshaus ze Raitenhaslach ze leibding vntzen an iren tot het inne gehabt, vnd nah ir tot mich derselben hu^ob ze vnreht vnderwnten het vnd in dar an gewalt vnd vnreht getan han, das mir nu laid ist von gantzem meinem herzzen. Vnd das mir der erwærig apt Gebh(art) mit samt seiner samnung vergeben habt, geloben ich im pi minen trewen, das ich das mit meiner fuderung vnd mit minem scherm, di weil ich leb, hinz dem gotshaus verdienen wil. Vnd das in von mir furbas oder von dehainem anderm meinem erben oder freunt dehain ansprach oder schaden von meinen wegen gescheh, gib ich im vrchunt disen prief verinsigelt mit meinem insigel. Der brief^b ist geben, do von Christes bu^ort waren vergangen tausent drev hundert jar dar nah in dem neunten jar, an sant Gregorii tag in der vasten.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 555, S. 469-470