Wir Ott von gotes genaden kv^enich ze Vngern vnd wir Stephan pfallentz grafn | ze Reyn, hertzogen ze Beieren, verjehen offenbar an disem brief, daz wir dvrch vnsers hails willen vnd durch den willigen dienst, den vns der erwærg abtt vnd der conuent ze Raitenhaselach ie gedient habnt, swenn wir dez an si begert habn, vnd auch noch gern vns dienent, habn wir in gegebn vnd verschaffet ze einer ergetzvng, swaz wir dienstes von ir lævten genomen habn von vnsern ambten ze Hall fu^emf hundert pfvnt Regens (pvrger) pfenning, also daz man si ze dem næchsten sand Michels tag wer vnd verrichtt hvndert pfvnd pfenning Regens(pvrger) vnd dar nach ze dem næhsten in der quatemper, dev da ist in der ersten vast wochen, hvndert pfvnt, vnd dann von der selben quatemper fu^erbaz vber ein gantzes jar fu^emftzich pfvnt vnd fu^er sich also jærlich an derselben quatemper in der vasten alle jar fu^emftzich pfvnt, vntz si mit rechter raittvng der genanten fu^emf hvndert pfund verrichtt vnd gæntzlich gewert werden. Wir habn auch in vnseren getrewen Lud(weig) den Grans vnd sinev chint ze einem pflegær vnd ze voderær der vorgenanten pfenning gegebn, vntz si gæntzlich gewert werden nach der zeit, als obn verschribn ist. Vnd daz in daz stæt beleib, geben wir in den brief versigelten mit vnsern insigeln. Der brief ist gegebn ze Lantshu^ot millesimo CCC^o nono, an vnserer frawen tag in der vasten, als sie bechv^ennt wort.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 556, S. 470-471