Ich Vlreich Murzeær offen vnd tu^on chunt alle den, di disen brief sehent oder lesen ho^erent, das ich mit meiner housfrowen I Herraten vnd meins suns Hainreichs vnt meiner tohter Gerwirgen vnd mit ander meiner freunt gunst vnd gu^otem willen meiner sel vnd auh aller meiner voruodern vnd nahchomen sel ze sælden, za hail vnd zv einem ewigem selgeræt gegeben han meines rehten aigens ein gu^otel, datze Chirihperg genant ist, ledichleichein vnd freileihen vnser frowen dem gotshaus hinze Raitenhaslach. Dar vber von besunder gnaden, niht von dehainem reht, hat mir mein herre der erwærig apt Ilsunch von Raitenhaslach vnd sein samnung lassen alæin mein ains leib ze poumansreht irer gotshous ein gu^ot, das Poumgarten^a genant ist, mit sotaner beschaidenhait, das ich in das dienen schol vnd alle jar von dem selben gu^ot in an allev vrsah hin haim hinze Raitenh(aslach) auf den chasten geben vnd antwrten sibenzehen metzen chorns, sibenzehen metzen habern vnd zwen metzen^b waitz. Es wær denn als vil, das gemain pisess oder schawer des lands gewesen wær, so schol der dinst an meins hern des apts gnaden sten. Swelihs jares auh ich mein vorgenanten dinst versitz, das ich den vor der stift niht gegeben han, so ist das gu^ot von mir ledig warden vnd schol ich meinen vorgenanten herren allen mein dinst vergwissen vnd schol mein herre der abt oder sein amptman sein gu^ot ze Poumgarten^a freileichen stiften als ander seins gotshous freis aigen, mit swem||
er wil. Es hat auh denn noh ietzunt noh nah meinem tot weder mein housfrow noh dehains mein chint noh dehainer meiner freunt ihtesiht ze sprehhen oder ze chriegen nah dem gu^ot ze Poumgarten^a, wan ich is alæin ze mein ains leib ze poumansreht von im han gehabt, noh nah meinem selgeræt ze Chirihperg, wan ich is ledichleichein vnser frowen hintze Raitenh(aslach) gegeben han. Vnt zv einer ewigen stætichait dirr sahhe han ich mit meiner pet vnd flieg erworuen datz herren Hainr(eich) dem Ganzen, erwern vicedum von der Rot, das er disen brief ze vrchunt versigelt hat mit seinem insigel. Dar zv habent auh mein zwen freunt Peter der rihter von Piburch^c vnd Marchart der Morholtingner auh disen brief mit iren insigeln ze vrchunt gestætigt. Diser sahhe sint auh zeuch: Fridr(eich) der Darm, Vlreich von Roræh^d, Hainr(eich) von Gothalming, Chunrat der probst von Pfæffing, Chunrat der goltsmit, Nycola von Stumelperg, Ch(unrat) der Herzog, Vlreich Ru^ether, Chunrat der mu^elnær von Mosuogel, Wolfhart von Widern vnd ander pider læut mær. Der prief ist gegeben an sant Vincentii tag anno domini M^o. CCC. tercio decimo.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 578, S. 487-489