Ich Reitz, Albretz witib von Messling, vnd wir Ekk vnd Ekhart ir baider su^en offen vnd tu^on chunt allen den, I di disen prief lesent oder ho^erent lesen, daz wir bechant haben daz vnreht, daz vnser vater hat getan dem gotzhaus ze Raitenhaslach an dem gu^ot Pufftal^a, da vmb er auch christenleicher græb enpiert, vnd sein gestanden von allem dem reht, chriegen vnd ansprach, swie den waz, daz wir wanten zu haben auf dem vorgenanten gu^et ze Pufftal^a, vnd haben iz vreileichen ledich lazzen wider dem gotzhaus ze Raitenhaslach mit allem dem, daz dar zv^o geho^ert, besu^oechstz vnd vnbesu^oechstz, swi iz genant ist, gar vnd gaentzleichen. Vnd wan iz vnser vater Albreth verchvmert het vnd versætz, daz iz von vns niht machtt erlo^est werden, hat der ersam herre apt Ilsunch ze Raitenhaslach daz offt genant gu^ot ze Pufftal^a gelo^est vnd geledigt von Vlreichen dem smit von dem Nevnmarcht^b vmb drevzehen pfunt pfenning Regenspurger vnd hat auch vns vnd vnser offt genanten mu^eter durich sein besunder gnad der selben mv^enss gegeben drev pfunt, vnd hat vns dar v^eber gelu^ebt pei seinem genaden, daz er an allez gevær erwerben well, daz Albreht vnser vater in den vreithof^c wert bestatt. Vnd wan die verrihtigung vnd die verzeihnu^ess ist geschehen ze Mu^eldorf vnd wir niht aigens insigels hæten, hab wir die erwerigen purgern, vor den disev handlung ist geschehen, mit grozem ernst vnd vleiz gebeten, daz si dez taidinch o^ellev, als si oben sint geschriben, gestætigen vnd geuesten mit der stat insigel. Diser sach aller sint gezevg: her V^olr(eich) der pfarrer von Nidernperchirichen, her Hainrich der rihter, Peder^d, Ekk, Ott Zehentner, Ch(unrat) Wolfoltinger, der Aigner, der Swertfu^erib, Ch(unrat) Newmaisters aidem, der lang Ott, Fridreich der Darm, Ch(unrat) goltsmit, Ch(unrat) der probst von Oberhoven^e, V^olrich der Wintperger^f vnd ander erberig purger vnd zevg genu^og. Der prief ist gegeben ze Mu^eldorf, da von vnsers herren gepurt warn drevzehen hundert jar vnd in dem drevzehendem dar nach, des suntags vor sand Valteins tag.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 580, S. 490-491