Ich Lvdweich Grans tv^on chvnt allen den, di disen brief sehent vnd ho^ernt lesen, | wan der abtt vnd daz convent des gotshavses von Raitenhaslach oftt vnd dichke ennher mir schvldich ist gewesen beraiter pfenning, di ich in gelihen het, vnd getraides vnd ander gv^ot, des si mir avch sint schvldich gewesen, ich bin in avch schvldich gewesen weines, den si mir gegeben heten, ziegelstain vnd tvftstain, daz habn wir allez gegen einander verraittet, vnd swaz des alles baidenthalben ist gewesen, daz ist allez ab vnd hin, also daz ainer dem andern nihtes mer schvldich ist beliben vntz vf den hevtigen tach. Ich sag si avch ledich an disem brief, daz si des meinen nihtes niht inne habnt noch in nihtes niht ze behalten han gegebn beraites gv^otes noch anders niht. Vnd daz avch dar vmb mein sv^en oder ieman anders von meinen wegen an den vorgenanten abtt vnd an daz conventt^a niht ze vodern hab, gib ich in disen brief ze einem vrchv^end mit meinem insigel vnd mit meiner vorgenanten sv^en aller insigeln versigelt. Daz ist geschehen ze Bvrchavsen millesimo trecentesimo XllI^o, an sant Georii tag.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 582, S. 492