Wir graf Heinrich von Leonberch^a tu^on allen den chunt, di disen brief ansehent oder ho^erent | lesen, vnd verjehen auch offenbar, daz wir haben gegebn vnsers vræin vnd rehtes ledigens aigen zwen ho^ef ze Pæbing^b, den mittern vnd den nidern in dem dorf, mit alle dem vnd dar zv^o geho^ert, ze veld, ze holtz, ze wismat, besu^oht vnd vnbesu^oht, swie ez genant ist, vnser frowen vnd dem goteshaus ze Raitenhaslach ze rehtem geselgeræt vnd ze einer getzung vnd ze einer pezzerung eines hoves vnd einer mu^el, daz frow Agnes, vnser mu^oter, der got genad, pi ir lebentigen het benaihent vnd geben dem goteshaus ze Raitenhaslach, daz wir im enpfremd haben, vnd haben ez gegebn dem chloster ze Viehtpach. Vnd won di vorgenanten ho^ef ze Pæbing verchumbert waren vnd stu^onden, hat si der ersam herre apt Ilsunch von Raitenhaslach mit sines goteshauss gu^ot erlo^est vnd geledigt von Ebn von Hoholting vnd von Heinr(ich) von Lewprehting vmb siben vnd vierzich pfunt vnd vmb drei Schilling Regenspurger pfenning. Vnd da mit haben wir dem vorgenanten apt Ilsunch vnd daz goteshaus ze Raitenhaslach gesetzet in nvtz vnd gewer der voruerschriben ho^ef Pæbing in allem dem reht vnd nv^etzen ewichlichen ze habn vnd ze besitzen, als wir ez vnd vnser vordem habn inne gehabt vnd besezzen. Vnd daz vnser frowen vnd dem goteshaus ze Raitenhaslach daz selgeræt vnd di ho^ef ze Pæbing an chrieg vnd an alle ansprah ewichlich beleih, da v^eber gebn wir im disen brief versigelt mit vnserm hanganden insigel ze einer ewigen festigung vnd ze einem waren vrchu^end aller diser sache. Des sint gezevg: her Heinr(ich) pfarrer ze Hierzorn^c, der Tæchinger, Chunr(at) der Seifridesdorfer^d, Eb^o von Hoholting, Heinr(ich) von Levprechting, Dietmar der Rigelpekch, Seytzel der chamerær, Heinr(ich) der Resch vnd Chunr(at) der Schreiber pfarrer datz Zimmern vnd ander piderb læu^et. Der brief ist gegebn, da von Christes gebv^ert waren drevzehen hvndert jar vnd dar nach in dem fu^enfzehenten jar, des montages an sand Tyburtzen vnd sand Valerians tag.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 593, S. 503-504