Ich brv^oder Ott Seifritstorfer, nouitz ze Raitenhaslach, vergih vnd tv^en chunt alle den, di disen brief | ansehent oder lesen ho^erent, daz ich meinen aigen hof ze Mitterperg, der genant ist Maierhofn^a, vnd mein drei aigen ho^ef ze Nevfarn mit samt der||
vieschwait vnd mit alle dem, daz zv den vier ho^efen geho^ert, besv^ehtz vnd vmbesv^ehtz, gegeben han ze rehtem selgeræt mein vnd meiner lieben hausfrawen Jævten vnd vnser paider væter vnd mv^eter sel ze hail vnd ze hilf der erwærigen samnung meiner lieben bru^ederschaft hie ze Raitenhaslach mit sotaner beschaidenhait, daz der selben samnung pitantz pfleger, oder swem is der herr vnd apt enpfiliht, der vier ho^ef gv^elt, Stift, stewer, wandel, dienst, chlain vnd grozzen vnd allen nvtz alle jar ine nemen schol vnd von dem allen schol er der offt vorgenanten samnung ewichleichen alle sabentztag in der vasten vor ostern vmb drei Schilling pfenning viesch oder ein ander pitantz, di si als gern haben, chauffen vnd geben. Dar v^eber an meiner vorgenanten housfrawen Jævten jarzeit schol er vmb drei Schilling pfenning der samnung viesch chauffen vnd geben. Dar v^eber an der vigili ze pfingsten, sant Johannis Baptist, sant Peters vnd sant Pauls, sant Laurencii, vnser frawen schiedung, sant Mathei, sant Symonis, aller heiligen, sant Andree vnd an sant Mathie abent vnd vigili schol der vier ho^ef gv^elt innemær der samnung ze igleicher zeit vmb ahtzch pfenning viesch chauffen vnd geben. Mæht aber der vier ho^ef gv^elt so verre nicht geraihen, daz man ditz selgeræt gæntzleihn also der samnung gæb als hie geschriben stæt, swo di gv^elt abe get, do ist weder vnser herre der apt noh der chelner noh der pfleger der ho^ef nicht gepunden dehain pitantz von den ho^efen ze geben der samnung. Wurt aber der gv^elt icht mær von den ho^efen, denn hie geschriben ist, nah dem schol der pitantz pfleger aber nah seiner gewissen der samnung daz pest tvn, daz er mach. Dar vber dez ersten tags in der Weisung schol der pitantz pfleger dem weiser geben zwelif pfenning vnd schol der weiser der alt herren vier oder fu^emf fragen pei der gehorsam, ob ditz selgeræt also der samnung gegeben sei, als vor hie an disem brief ist geschriben, oder nicht. Swez denn der offt vor genanten samnung hie ze Raitenhaslach nicht gegeben ist, daz doh von den^b vier ho^efen ine genummen ist, daz schol im der weiser geben haissen vnd schol ez hintze Salmonsweier sein selbez samnung pringen vnd geben. Vnd das ditz selgeræt also ewichleichen stætez vnd vnzeprohhen beleib vnd gæntzleichn, als geschriben ist, gegeben werd, habent di erwærn herren apt Chunr(at) von Salmonsweier vnd apt Ilsunch hie von Raitenhasl(ach) nah meiner grozzen pflig vnd bett willen mir vnd der samnung zv einem vrchunt disen brief versigelt mit ir paider anhangvnten insigeln. Der brief ist gegeben ze Raitenh(aslach) an sant Seruacii tag anno domini millesimo||
trecentesimo sexto decimo.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 605, S. 515-516