Ich Johans Pfæffigner rihter, vnd wir die zwelif genanten vnd auh di gemain pu^orger ze Mu^eldorf | geben ze wizzen alle den, di disen brief lesen ho^ernt, das Pfosse vnd Fridreich sein bru^oder, Seibots su^en von Polling, dem got genade, alle di ansprach vnd chrieg, di si heten, si wærn recht oder vnrecht, gegem dem gotzhous ze Raitenhaslach vmb den hof ze Chunihing, des si jahhen herren vnd gewern ze haben hern Chunraten den Achaimer, gæntzlichein in des chelnær hant bru^oder Wahsmutz von Raitenhasl(ach) gesetzt vnd gegeben habent vnd im in sein hant gelobt habent, das weder si selben noch dehain ir erib oder freunt furbas dehain ansprach vmb di sahhe nimmer mer gewinnen gegem dem vorgenanten gotzhous Raitenhaslach. Do wider hat desselben gotzhous erweriger herr apt Ilsunch in Pfossem vnd Fridr(eich) ze ergetzung gegeben nach seines chelnær vnd auch nach seiner samnung rat sehs pfunt pfenning Regenspurger vnd zwen lemberen ro^ech. Vnd das di sahhe also stæt beleib, habent vns Pfoss vnd Fridr(eich) des vleizchlichen gepeten, das wir zv einem ewigem vrchunt diser Verrichtung an disen brief vnser stat insigel gehangen haben. Der sahhe sint zeuch: Chunrat Magens der probst, Ott der Zehentnær, Peter der Pu^orger, Engelprecht der Neumaister, H(ainreich) der En, Ditmar der Schilicher, Vlr(reich) der Guffel, H(ainreich) der Schonschu^ester, F(ridreich) der^a Darm, Chunr(at) der Titler vnd ander pider læut mer. Der brief ist gegeben des næhsten suntag nah sant Johans tag ze sunnewenten anno domini M^o. CCC sextodecimo.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 607, S. 517-518