Ich Reinolt von Gu^eteneck vergich vnd tu^en chu^end allen den, die disen brief sehent oder lesen ho^ernt, das ich gar vnd ga^entzleich gestanden pin von meinem chrieg, den ich lang gehabt han gegem dem gotzhaws vnser frawenn vnd wider abbt vnd die||
sammung ze Raitenhaslach vmb ein halben hoff ze Su^ennpach, der vor halber von H[ainreich] dem Zolna^er von Landaw, dem got genad, ze selgra^et ledichleichen gegeben was dem vorgenantem gotzhaws hintz Raitenhaslach. Vnd wann ich den selben hoff gar han inne gehabt vnd auch in meinem gesweinn Reichgern dem Guntzchouer zu meiner swesteren Margreten mit anderm meinem gu^et versetzt het, hat der erwerig abbt Ilsunch von Raitenhaslach mit meinem rat vnd mit meinem guten||
willen Reichgern dem vorgenanten Guntzchofer siben phunt Regenspurger pfening gegeben vnd den hoff ze Su^ennpach aus seiner gewalt allen weis do mit geledigt vnd erlo^est. Vnd han ich mit meiner lieben frawen vnd mueter gunst Penditen vnd mit meiner hausfrawen Elspeten vnd meiner zwaier su^en Reinolts und Gotfritz vnd meiner tochter Anna vnd mit meiner swester gunst meiner swester Ja^euten vnd auch mit dem willen meines oft vorgenanten gesweins Reichgers des Guntzenchofers vnd seiner hausfrawen Margreten gunst den selben hof ze Su^ennpach mit alle dem, das dar zu geho^ert, versuechtz vnd vnbesuechtz, ga^entzleichen gegeben vnd mit sampt mir alle die, die vor genant vnd gescriben sind, zu einem ewigen selgra^et dem vorgenanten gotzhaws vnser frawen hintz Raitenhaslach. Vnd des fu^erbas chain chrieg vmb den selben hoff oder chain ansprach von chainem vnserm frewnt meg auf gesten, han ich dem vorgenanten herren vnd abbt Ilsunch vnd seiner sammung zu einem ewigen vrchunt disen offen brief gegeben verinsigelten mit meines gesweinn Reichgers des Guntzenchofers vnd auch mit mein selbs insigel. Der sache sint zeug: der erberig abbt Chunrad von Alderspach, bruder Hainreich der Toubnar, pruder Wahsmu^et der chelner von Raitenhaslach vnd do selben bru^eder Fridreich von Piburg; Chunrad der Poppenp[er]ger, Rudger Poppenp[er]ger, Fridreich Poppenp[er]ger, Eberhart de Weng, Sweigker de Alderspach, Wlfinch von Ernstorf, Albrecht von Hainreichstorf vnd Fridreich der Darm vnd ander pider la^ewt mer. Der brief ist gegeben ze Alderspach an sand Vincencii tag anno domini M^o. CCC^o. septimodecimo.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 609, S. 519-520