xxx [3x: untereinander] Wir xxx [3x: untereinander] Heinrich vnd Ott von gotes genaden pfallntz grafen ze Reyn, hertzogen in Bayern, vergehen offenbar an disem | brief, daz wir ze engagen alles vnsers rates chvntleich gantz vnd allen weis vnbechrenchet gesehen haben vnd gelesen die hantveste, die daz gotshavs ze Raitenhaslach von vnserm vrênen hertzog Otten vnd vnserm lieben enen hertzog Heinr(ich), den got genade, vnd auch von baiden Ortlieben von Walde dem alten vnd dem jvngen hat, dar an wir mit gantzer worhait erfvnden haben, daz daz selbe gotshavs gewalt hat ze richten hintz allen seinen lævten vnd gv^oten in den gerichten ze Walde vnd ze Mermos vmb alle sache; wan swaz hintze dem tode gêt, da sol der richter den schedelichen man nemen, wan als er mit der gv^ertel vmbvangen ist, vnd sol alles daz gv^ot, daz der man hat, varent vnd vnvarent, dem gotshavs beleiben. So hat avch daz selbe gotshavs von newen dingen dev selben gerichte mit dem gemainen chavffe der gerichte geraichet in den oben genanten gerichten, als anderev gotshævser vnd alle lævt in vnserm lande, swie ez doch von alten dingen dev recht hiet in den oben genanten gerichten, als vor berv^eret ist. Vnd da von, wan wir dem oben genanten gotshavs ze Raitenhaslach allev seinev recht mit dehainen Sachen nicht wellen minnern, svnder wir wellen im dev mit gantzem willen vnd besvndern genaden durich vnser, vnsrer vodern vnd nachchomen hail gern erchennen, meren vnd volfv^eren, stætigen wir im mit disem brief nach alles vnsers rates rat vnd willen baidev die oben genanten sein hantveste vnd avch dev recht, dev ez von dem gemainem chavff der gerichte hintz seinen lævten vnd gv^oten hat. Daz im daz also stæt beleihe vnd vnzerbrochen, geben wir im disen brief versigelten mit vnserm insigel zv^o einem vrchv^end. Der ist geben ze Purchavsen^a da von Christes gepvrt ergangen waren tavsent jar drevhvndert jar darnach in dem sibenzehenten jar, an sand Lvcie tag.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 617, S. 525-526