Ich Lvdweich der jvng Grans vergich vnd tv^on chvnt allen den, die disen brief sehent oder ho^erent | lesen, wan der ersame abt Illsvnch von Raitenhaslach gezaiget hat vnd fv^erpracht meinen lieben herren herm Heinr(ich) vnd herm Otten den edeln hertzogen in Baieren vnd ir rat die hantvest, die daz gotshavs ze Raitenhaslach von ir vodern vnd von herm Ortlieben von Walde vnd seinen vorvodern, den allen got genade, v^eber dev gerichte, dev ez hintz seinen lævten vnd gv^oten in den gerichten Walde vnd||
Mermos hat, dev si im mit ir briefen avch gestætt habent, vnd avch er mein vorgenant herren hat beweiset, daz mein vater her Lvd(weich) der alt Grans, da er dev vorgenanten gerichte Walde vnd Mermos warbe von meinem herren chv^enig Otten,||
dem got genade, dem vorgenanten gotshavs mit des selben meines herren des chv^eniges wizzen seinev recht bechant, dev ez in den selben gerichten hat, daz ist, daz ez gewalt hat ze richten hintz allen seinen lævten vnd gv^oten, die in den obengenanten gerichten sint, vmb alle sache, wan vmb die sache alein, die hintz dem tod gent, bechenne avch ich dem obengenanten gotshavs ze Raitenhaslach seinev recht, dev ez hintz seinen lævten vnd gv^oten in den obengenanten gerichten Walde vnd Mermos hat nach seinen hantvesten, alten vnd new^en, vnd widersag vnd gesten avch gar vnd gæntzleich von aller der ansprach, dev ich oder meine erben oder dehain vnser richter oder amptman hintz seinen lævten oder gv^oten mit gerichte mo^echten gehaben, wan alein, swaz hintz dem tode get, daz sol ich hintz dem schuldigen mann richten, wan als er mit gv^ertel vmbvangen ist, swaz er gv^otes hat, daz sol dem gotshavs beleiben vnd sol ich mich dez noch dehain mein amptman nicht vnderziehen, chlain noch groz, wenich oder vil. Daz im daz also stæt beleihe vnd vnzerbrochen, gib ich disen brief mit meinem vnd hern Seifrid von Pu^ochperch, meiner herren der hertzogen hofmaister, ze merær gedenchnv^ezze insigeln versigelten. Diser sache sint zevge: her Hartl(ieb) von Pu^ochperch, her Jo^erig von Chabers, her Frid(reich), meiner obengenanten herren der hertzogen Schreiber, vnd V^olreich der Ekkær. Dev taidinch sint geschehen ze Landshv^ot, da von Christes gepvrt ergangen waren tavsent jar drev hvndert jar dar nach in dem achtzehenden jar, an sand Erhartes tag.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 618, S. 526-528