Ich swester Alhait von Essenpach tu^en chunt allen den, die disen brief ansehent oder lesent horent, das mein vatter mayer Fridreich von Essenpach, dem got genad, mir bey seinem lebentigen leib geschaft het auf seinem gu^ot ze Vnchawfen^a ze na^emen fu^er den chlainen dinst alle jar an sand Go^ergen tag fu^emf vnd zwaintzigt pfening Regenspurger und da mit seinen jartag wegen. Die selben fu^emf vnd zwaintzigt pfening Regenspurger han ich swester Alhait mit meiner bruder vnd frewnt rat geschaft ze rechten selgra^et dem conuent ze Raitenhaslach mit der beschaidenhait, wer das vorgenant gut zu Vnchofen inne hat, das der an alle vrsache, es slache der schawer oder pisez, geben sol an sand Jo^erigen tag fu^er den chlainen dinst dem vorgenanten conuentt fu^emf vnd zwaintzigt pfening Regenspurger, vnd sand Laurenczen abent, an dem meins vatter jartag ist, sullen die selben pfening vmb vischs dem conuentt gegeben werden. Der sache sind zeug: mein o^ehaim bruder Vlreich der Sarsacher ze Raitenhaslach, Fridreich der amman von Essenpach vnd sein su^en Hainr(eich), Rueger, Vlr(eich) mein bruder, Hainr(eich) der Essenpekch mein bruder, Vlr(eich) der Swarcz, mein swester Jeut von Westen vnd der selben tochter, swester Gedrawd, Chunigunt vnd Jeut die Scharsacherinne vnd ander bider lew^et mer. Vnd wan ich aigens insigel nicht enhan, hat durich mein vnd durich meiner frewnt willen vnd gebet der ersamme man Vlr(eich) der Roraer von Merschofen sein insigel an disem brief gehangen yem an allen schaden ze vrchund diser sache. Der brief ist geben ze Lanntzhw^et, da von Christes gepu^erd vergangen waren drewzehen hundert jar dar nach in dem zway vnd zwaintzigistem jar, an sand Bendicten tag in der vasten.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 641, S. 550-551