Wir bru^oder Ylsung(us) abbt ze Raytenhaslach mit aller vnser sammvnge verjehen vnd tu^on chvnt | an disem brief allen den, di in sehent oder ho^erent lesen, daz der ersam ritter her Lvdweig der alt Grans, dem got genade, vns vnd vnser sammvnge hat gegebn ze rehtem selgeræt des ersten ainen hof ze Rehpokingen^a, dar nach drey ho^ef ze Pollingen vnd ainen hof ze Wintpo^ezzingen^b mit der beschaidenhait, daz wir von dem hof ze Rehpokingen^a begen sullen alle jar seines vater vnd seiner vorfodern jartag an sant Georgen abent des nahtes mit der vigily vnd des morgens mit der selmess in der chapellen an der porten, als sein hantfest sagt, vnd von den andern oben genanten ho^efen sol man alle freytag geben der sammvng sehtzig pfenning Salzburger vmb vische. Vnd daz des genanten hern Lvdw(eig) Grans gu^oter will vnd andaht gæntzlih volfu^ert wert, sullen wir nah seiner sv^en pet, hern Wernharts, hern Perngers vnd hern Lvd(weigs) vnd alle vnser nachchomen, swer denn abbt ist, nah der altherren rat auz der sammunge einem herren di genanten ho^ef mit ir gu^elt enpfelhen, der von dem gelt daz obn genant geschæft gar vnd gæntzlich volfu^er. Vnd sol auh der selb herr alle jar vns vnd der sammvnge daz selb gelt wider raytten zwi^er oder drey stunt vnd sullen di genanten Grens, ob si wellent, iren boten bei der raittung habn. Waer aber, daz der herr an dem geschæft sævmig wær oder daz er sein vor anderm des ordens geschæfft niht gepflegen mo^eht, so sol, swer denn abbt ist, den selben nach der altherren rat verchern mit einem andern, der es pezzer vnd mit fleizz volfu^er. Es sol auh vnser vater der ersam abbt von Salmonswyler, der vnser weiser ist, alle jar in der weisunge mit ernst di sammunge vnd auh den pfleger fragen auf ir gewizzen vnd gehorsam, ob daz genant geschæft wol volfu^ert sei, vnd fund er kain sævmung, dev in dem jar wær dar an geschehn, so sol er daz selb alain, swaz in dem jar versævmet ist, hin haim seiner sammvnge bringen vnd an legen in aller der weis, als es^c vns geschaffet ist, vnd sol vns daz fu^erbaz an drew jar an vnser gu^elt vnd an vnserm rehten dehain schade sein. Daz daz alles stæt beleib, sullen wir werben an disen brief vnsers vorgenanten vater vnd weiser des abbtes von Salmonswiler insigel zv^e sampt dem vnserm ze einem ewigen vrchunde. Der brief ist gegebn, do von Krystes gebu^ert vergangen worn drevzehen hvndert jar dar nah in dem fumfvndzwaintzigsten jar, an sant Marie Magdalen tag.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 660, S. 563-564