Ich Chunrad gehaissen der Apt, purger ze Purchausen, vnd mit mir mein hausfrawn frawn V^et verjech vnd tu^en chunt an disem brief allen den, die in sehent oder ho^ernt lesen, das wir wedenchen vnd erchennen die gnade vnd trew, die vns habent getan der ersam abbt Ilsunch ze Raitenhaslach vnd die sammung da selbs, das ist, das si vns habent lassen vnd verliechen ir haws ze Purchawsen vnd ain hueb datz Vbra^ekchen, dew da haisset Dornperch, ze haben vnd ze niessen zu vnser baider leiben vnd nicht lenger. Vnd ist das emalen geschechen vnd auch verschriben, do von Christes gepu^erd vergangen waren drewzehen hundert jar vnd dar nach in dem zwaintzigistem jar an sand Veits tag. Nw habent sie vns ze dem andern mal aber mer genaden vnd fuedrung getan vnd habent vns verliehen vnd lassen ain ander hueb datz dem vorgenanten Vbra^ekchen, dew haisset auf dem perig, auch ze haben vnd ze niessen zu vnser baider leiben vnd nicht lenger; auch habent si vns genomen in ir besunder bruderschaft. Vnd dar vmb haben wir mit gutem bedachtem ainmu^etigen willen gegeben vnd geschaft dem oben genanten gotzhaws vnd der sammung ze Raitenhaslach durch got vnd durch vnser sel hail ze rechtem selgra^et all vnser hab vnd das gu^et, das vns beleibt vnd über wirt an vnserm to^ed, gemainchleich vnd ga^entzleich an alles geua^er, das si an beraitschaft, an pett, gewantt oder an anderm hausgerecht oder an gelt, das man vns gelten sol oder schuldig wirt, das sullen si alles sampt haben vnd in nemen nach vnserm tod ze selgra^et vnd ze aigen. Vnd sol das genant gotzhaws vnd die sammung in das alles sta^et vnd vnzebrochen beleiben, geben wir in disen brief ze einem offen vrchunde, an den nach vnser grossen pet vnd fleg der ersam man her Wolfger von Ramsstorff, vitztumb bey der Row^et, sein insigel hat geleit vnd her Fridreich pfarrer vnd techent ze Purchausen vnd ich Chunrad der Abbt das mein. Der brief ist gegeben, do von Christes gepu^erd vergangen waren drewzehen hundert jar dar nach in dem fu^emf vnd zwaintzigistem jar, an vnser frawentag ze liechtmess.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 659, S. 562-563