Wir bru^oder Ylsung abbt ze Raytenhaslach mit aller vnser sammung verjehen an disem brief allen | den, di in sehent oder ho^erent lesen, di nu lebent vnd her nach kvnftig sint, daz der ersam herr her Hartlieb von Pu^ochperch^a mit seiner gu^otæt an vns geworuen hat, daz wir alle jar ewichlich sein vnd seiner voruodern jartag^b begen sullen nach vnsers ordens gewonhait an dem pfintztag in der osterwochen, daz haben auh wir im gelobt vnd gehaizzen. Also hat auh der ersam man her Fridrich der mautner von Purchausen mit seiner gu^otæt an vns geworuen, daz wir begen sullen sein vnd seiner voruodern vnd seiner hæusfræun vræun Marg(ret), der got genade, jarzeit alle jar an dem næchsten tag nach dem ebenwich tag. Vnd an den zwain tagen sol man geben vnserm conuent zwen gu^ot dienst von vischen vnd sol man di nemen von den zwain ho^efen datz Pæbingen, di wir dar zu^o gechauft vnd gegebn haben. Wir haben auh dar zu^o gegebn ain gu^ot ze Mitterhulgen^c, daz gilt vierdhalben schillinch O^etinger pfenning an chlainen dienst. Wir sullen auh von den^b genanten drein gu^oten vier ander jarzeit begen alle jar ewichlich, des ersten vnsers gotshaus stiftær des erwærn herren hern Chunr(at) des ertzbischofs von Salzpurch, hern Wolf hers von Tegernwanch vnd vnser gu^oten freunt Peters des Chæutzleins von Salzb(urch), Meinhartes des Newmaisters, vræun Dietmu^oten der Vo^eglin, Wernhers æuz der Milichgazzen von Pazzæw vnd ander vnser gu^oten freunt. Vnd dar vmb sol man vnserm conuent geben von den obngenanten drein gu^oten vier dienst von vischen an vier tagen, an sant Benedicti tag, an sant Bernharts tag, an aller sel tag vnd an dem næhsten tag nach sant Lamperti tag. Es sol auh, swer denn vnderchelner ist, von den oft genanten gu^oten den grozzen dienst in nemen vnd di stewer; der chlain dienst sol geuallen in di gemain dem conuent, vnd swer denn herr vnd abbt ist, der sol dev stift in nemen. Auh sol der vnderchelnær di vorgenanten dienst der sammung geben vnd volfu^eren, als oben verschriben ist. Swenn er des niht tæt vnd versæumet, so sol er bei seiner gewizzen ain^d wein sein vntz er ie den dienst gegeb; trunch er dar vber wein, so sol zv altar ze mess niht chomen, vntz er es gar vnd gæntzlich geb vnd volfu^er. Geschæh aber dehain versæumung an dem geschæft, so sol vnser vater vnd weiser der ersam abbt von Salem, als ain dienst versæumet wurde, des niht geschehen sol, alz oft daz geschæh, ain pfunt O^etinger pfenning in nemen von vns vnd sol daz seinem conuent hin haim bringen vnd geben. Er sol auh alle jar mit fleizz in der Weisung fragen vnd vorsehen, ob daz obngenant geschæft wol volfu^ert sei, vnd sol man im dar vmb ze vrchund alle jar in der Weisung geben viervndzwaintzig pfenning Regens(purger). Vns hat auh der ersam man her Hainr(ich) von Hoholting zwai gu^ot datz Cholbach gegebn, daz man da von durch seiner sel willen an ettlichen tagen dem conuent visch geben sol, als sein hantfest sagt, di wir dar vber von im haben; von den sol auh, swer vnderchelnær ist, den dienst in nemen vnd sol da von volfu^eren, alz er geschaffet hat. Vnd wurd von den gu^oten allen, dev oben geschriben sint, ichtes iht vber di dienst, di man da von tu^on sol, daz sol der vnderchelnær an legen nach des prior vnd des subprior vnd zwaier altherren rat dem conuent ze pezzrung. Daz daz alles vnzerprochen beleih, geben wir disen brief ze ainem ewigen vrchunde, an den nach vnser grozzen pet di ersamen herren abbt Vlrich von Kayshaim vnd vnser weiser abbt Chu^onrat von Salem irew insigel geleit habent zesampt dem vnsern. Der ist gegebn nach Christes geburt vber derewzehen^e hundert jar dar nach in dem sibenvndzwaintzisten jar, an sant Barnabe tag.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 667, S. 568-570