Ich Albrecht Widmer, purger ze Mu^eldorf, vergich offenlich an disem brief allen den, die in sehent, das ich mit andach^a vnd gu^etem willen, do ich es wol macht get/en, han gegeben vnser frawn vnd dem gotzhaws ze Raitenhaslach ze einem rechten selgra^et mein aigen ze Polling, das ich gechauft han ledichleich von Jansen dem Pollinger. Ich han auch dem selben gotzhaws ze Raitenhaslach vnd dem convent da selben gegeben meinen aigen stadel in der stat ze Mu^eldorf ze rechtem selgra^et mein vnd meiner hawsfrawn Chunigunden vnd aller vnser voruoder mit sotaner beschaidenchait, das ich des selbens stadels gewaltig sei mit sampt meinen herren, die weil ich leb; aber nach meinem tod so sol der obgenant stadel gar vnd ga^entzleich meiner herren vnd des gotzhaws ze Raitenhaslach freys vnd ledigs aigen sein an allew ansprach meiner hausfrawnn Chunigunden vnd von allen meinen eriben vnd frewnten, wie die genant sein. Ich han auch dem oft genanten gotzhaws vnd dem conuent ze Raitenhaslach gegeben ze einem rechten selgra^et achtzehen phunt O^etinger pfennig; dar vmb sullen si chauffen ain aigen, vnd was das verdienen mag, das sol der abbt, die weil ich leb, einnemen auf den gemainen chasten, vnd nach meinem tod sol man den selben dienst tailen vnd sol in halben geben an meinem jartag der oft genanten sammung ze Raitenhaslach vmb vischs vnd vmb weis prowt vnd sol dew sammung dar vmb mir an meinem jartag ein selmess singen. Der ander halb tail des dienstes sol geuallen auf den gemainen chasten, vnd ist auch das alles geschechen mit meiner hausfrawen Chunigunden gutem willen vnd wissen. Des sind zeug: Hainreich der Grasman ze den Zeiten richter ze Muldorf, Dietreich der Chastna^er, Dietmar der Schilher, Hainreich der Enn, Rudolf der Stafphel, Jans der Purger, Hainreich der Scho^enschuester vnd ander pider zeug genu^eg. Das das alles sta^et vnd vnzebrochen beleih, gib ich dem oftgenanten gotzhaws vnd dem conuent ze Raitenhaslach disen brief ze einem ewigen vrchund versigelten mit der stat insigel ze Mu^eldorf, das ich dar an mit grosser pet vnd fleg erworuen han, der stat vnd auch den purgern an schaden, wan ich selben nicht aigens insigels han. Der brief ist geben nach Christes gepu^ert vber drewzehen hundert jar dar nach in dem dreissigistem jar, an dem pfingst abent.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 677, S. 578-579