Wir Heinr(ich) von gots genaden pfallentz graf ze Reyn vnd hertzog in Baieren verjehen offenbar an | dem brief, wan di Mo^eringer von der lehenschaft an dem hof ze Ettenaw^a bei Æst^b in Titmænninger gericht, di si von vns heten, mit gv^etem willen vor vns gæntzlich gestanden sind, also daz si vnd ir erben fu^erbas dhain ansprach dar nach haben mv^egen noch gewinnen ewichlich, sein wir durch vnser, vnsrer vorvodern vnd nachchomen ewiges hail vnd sæld von derselben lehenschaft auch gestanden vnd haben den oben genanten hof ze Ettenaw^a dem gotshavs vnd den herren ze Raitenhaslach geaigent also, daz daz selb gotshavs vnd di herren daselben den oben genanten hof inne haben su^ellen vnd niezzen ewichlich mit alle di vnd dar zv^o geho^ert, besu^ocht vnd vnbesu^ocht, an alle ansprach vnd i^errvng, als ander ir aigen gv^ot vnd vrbor. Vnd dar v^eber ze einem vrchvnd geben wir in den brief versigelten mit vnserm insigel. Der ist geben ze Purchausen, da von Christs gebv^ertt waren drevtzehen hvndert jar dar nach in dem dreizzigistem jar, an sand Katerein abent.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 679, S. 579-580