Ich Mætz deu Schu^ehstlinn, purgerinn datz Tytmæning, vnd mein su^en Vlrich, Hainr(ich) vnd Christan | vnd mein to^ehter Erndraut vnd Elzbet vergehen an disem prief allen den, di in ho^erent oder sehent lesen, daz wir den hof datz Ettenæw^a pei Æsten^b, der gelegen ist in der grafschaft ze Tytmæning, besu^oht vnd vnbesu^oht, mit allen den nu^etzen, di dar zu^o geho^erent, haben ze chauffen gegebn den erwern herren apt Hainr(ich) vnd der sammung ze Raitenhaslach vmb zwaintzig pfunt Salzb(urger) pfenning vnd vmb ain schaf chorns vnd vmb drey grob ro^eche ze leitchauff den obgenanten Vlr(ich), Hainr(ich) vnd Christan, vnd habn auh in den genanten hof aufgegebn mit herren hant, von den er vnser reht lehen waz, daz ist Ot der Mo^eringer, Hainr(ich) vnd Andre di Mo^eringer, gar vnd gæntzlich, daz wir furbas noh chain vnser erbe vnd nachchomen dar nach chain ansprach nimer mer gewinnen oder habn sullen. Vnd sint des zeug, di da bei warn: Ot der Mo^eringer, Berchtolt der Zink, Frid(rich) von Inspruk, Wernher Lændel, Chunr(at) der Vetsch, Ru^edel der Chursner, purger ze Purchu^osen^c; Alphart, Christan der Weilhaimer, Christan der List, Chunr(at) der Gwikker, purger datz Titmæning, vnd ander leut genu^og. Daz in daz also stæt vnd vnuerchert beleih, gebn wir disen prief dem obgenanten chloster ze Raitenhaslach ze einem ewigen vrchund mit des erwern mannes hern Chunr(at) von Chuchel insigel, im an schaden, der ze den zeiten purchgraf waz ze Tytmæning, wan wir selber aigens insigels niht heten. Der prief ist gegebn nach Christes gepurt vber dreuzehen hundert jar dar nach in dem dreizzigsten jar, an sant Andres tag.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 680, S. 580-581