Den ersamen vnd weisen herren dem abbt vnd dem conuent^a des gotzhaws ze Raitenhaslach enbiut ich Engelprecht Ra^ehenstamph, purger ze Wasserburch, Ekhart vnd Liebhart mein prüder, vnser hawsfrawen vnd alle vnser erben vnsern dinst. Wir lassen ewch wissen, das wir Engelprechten den Loner, purger ze Wasserburg, seiner hausfrawen vnd sein erben auf haben geben vnd vns hintz in vertzigen haben aller der recht, die wir von ewch gehabt haben auf dem gu^et ze Walthayming, vnd pitten wir ewch fleissig, das ir in die selben recht auf dem gut macht vnd verschreibt, als ir wist, das ir tuen sullet, wann wir ewch ledig sagen vmb^b das selb gut. Vnd dar vmb zu einem vrchund geben wir disen brief versigelt mit Chunrad des schuelmaisters insigel ze Wasserburch iem an schaden, da wir vns vnder verpinden. Des sind zeugen: Vlreich Chrayburger des Seler aidem, Fridreich Chaufman, Fridreich Scheffel, Fridreich La^edrer, purger ze Wasserburg, Empel von Obingen. Das ist geschehen, do von Christi gepurt waren drewzehen hundet jar dar nach in dem newn vnd dreistzigistem jar, an sand Erasm tag.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 702, S. 600-601