Ich Wülfinch von Goldekk vergich offenbar an disem brieff fu^er mich vnd fu^er mein hausfrawn vnd fu^er all mein erben, daz ich durch meiner sel willen vnd aller meiner voruodern dem goczhaus ze Raytenhaslach vnd der sammung da selben gegeben han ze rechtem selgret meinew drew gu^et in der Castein, dy gehaissen sind Im graben, Praitenperch vnd In der lakchen, daz sy dy ewichleich haben su^ellen fu^er freyz vnd ledigs aigen, besu^echt vnd vnbesu^echt, mit dienst vnd mit stift, vnd mit allen den nu^eczen, dy da von mu^egen cho^emen. Vnd han auch sy der gu^et in nu^ecz vnd in gewer geseczt bey mir lebentigen, do ich daz wol getan mocht, mit der beschaidenchait, daz dy obgenanten herren von Raytenhaslach alle jar ewichleich meinen jartag su^ellen begen an dem tag, alz got vber mich gebu^ett, oder dar nach inner acht tagen, wann sy dez aller besst weil vnd mu^ezz haben. Vnd an dem selben tag sol man der sammung einen dienst geben iesleichem ein trinkchen welschs weins vnd ein weysses brott vnd czway stukch gesulczter visch. Si su^ellen auch an dem vorgeschriben meinem jartag dez abencz gemainchleich vigily singen vnd an margen gemainchkleich messe vnd sol mein dannoch wesunderleich gedacht weren in irem capitl vnd sol da besunders gebet vmb mein sei auf geseczt werden. Wa^er aber, dez got nicht welle, daz dy obgeschriben herren von Raytenhaslach dy ob genanten pu^end v^eber fu^eren vnd mein jartag vnd den dienst allenweis nicht volfu^erten, alz oben ist verschriben, dez selben jares, wye offt vnd wye dikche daz gescha^ech, sol der dienst vnd dy nu^ecze von den obengenanten gu^eten geho^eren in daz spital ze Salczburch gar vnd ga^enczleich vnd sol daz den offt genanten heren vnd dem goczhaus ze Raytenhaslach andre jar, in den si dy obengenanten vnd verschribenew taiding ga^enczleich volfu^erten, an schaden sein vnd allen iren rechten. Vnd daz in vnd auch mir daz also sta^et vnd vnuerricht beleihe von mir vnd von allen meinen erben, gib ich in disen brieff ze vrkund der warhait versigelten mit meinem insigl vnd mit meines su^ens herren Wulfinges insigl. Daz ist geschehen nach Christus gepu^erd v^eber drewczehen hundert jar in dem drew vnd vierczigistem jar dar nach, an vnser frawn tag ze der chundum in der vasten.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 715, S. 612-613