Ich Eberhart, hern Eberhartz des Chramær eninchel von Chrems, vergich vnd | tv^on chvnt alln den, die disen brief lesent oder horent lesen, daz ich mit wolverdachtem mv^oet zv der zeit, do ich iz wol getv^on machtt, dem beschaiden mann Rapoten, hern Mathes svn von V^eruar, vnd vern Chlaren seiner hausvrowen vnd iren erben rechtt vnd redleich verchoufft vnd gegebn han meinen Weingarten gelegn auf der haid, des fvmf jeuch sind, vmb ir varu^ont gut, des ich gar vnd gæntzleich gewert pin. Ich han auch in den selbn Weingarten auf gegebn mit perchmaisters hant Cholmans, di zeit hofmaister in Melcher hof ze Radendorf, da von man dient in den selben hof fvmf vnd sibnczk pfenning ze purchrecht alle jar an sand Cholmans tag, vnd dient man auch da von ze rechtem dienst ein pfvnt pfenning an sand Cholmans tag^a Perchthersgadmern hintz der eysnein tu^oer. Den vor gnanten Weingarten han ich gegebn dem vorgnanten Rapoten vnd seiner hausvrowen vnd iren erben ledichleich vnd vnverchvmbert mit alln den rechten, sam ich den selb mit nutz vnd mit purchrechtes gewer herpracht vnd gehabt han, ze versetzen vnd ze verchouffen, alln iren frvm da mit ze schaffen, wie in daz aller pestt chvmt. Vnd pin auch dez ir rechter scherm vnd gewer fu^er all ansprach, als purchrechtz scherms recht ist in dem land ze Ostereich. Vnd wi^egetanen schaden si dez dor vber næmen, den mier ir ains pei seinen trewen gesagen mag, den lube ich^a in gæntzliech ab ze legen mit meinen trewen, vnd gib in dez zv^o einem sichern vrchund disen brief versigeltn mit meinem insigel. Dar zu^ee sind zeug der sache mit iren insigeln di erbern mann der vorgnant Cholman vnd her Chv^enrat der Stozzel, di zeit sluzzler ze Chrems, vnd her Jans, hern Seidleins svn von Mautaren. Der brief ist gebn nach drevtzechn hvndert jaren von Christi gepu^erd in dem drev vnd viertzkistm jar ze ostern.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 717, S. 613-614