Ich Ru^eprecht der Imtzinger vergich vnd tu^on chu^ont an disem brief fu^or mich vnd fu^or alle mein erben vnd nachchomen, daz ich | mich mit gu^otem willen vnd wolbedachtem mu^ot redleich vnd rechtleich verricht vnd veraint han mit dem ersamen herren abbt Vlreichen vnd mit dem conuentt dez gotshauses ze Raitenhaslach vnd mit allen iren læwten vmb alle di schuld vnd ansprach vnd auflæuff, swie sich di ergangen haben vnd wie di genant sint gewesen mit recht oder an recht, swaz ich hintz in ze sprechen het vntz auf disen heutigen tag, nach der erbern herren rat hern Frid(reichen) von Torring vnd seines sv^ons hern Seyfrides vnd meines vettern Perchtolts dez Imtzinger vnd der erbern pu^orger von Purchausen Frid(reichen) von Insprukk vnd Perichtolts dez Zinkken mit der beschaidenhait, daz mir^a der ersame abbt vnd sein conuentt, di oben genant sind, gebent zway vnd dreizzig pfunt Saltzburger pfenning fu^or alle di schuld vnd ansprach, als oben geschriben ist, vnd habent auch mich der selben pfenning redleich vnd rechtleich gewert vnd verricht gantzz vnd gar, vnd sol auch ich vorgenanter Ru^oprecht noch dhain mein erbe oder nachchomen fu^orbaz dhain ansprach nicht mer haben hintz dem ersamen obengenanten abbt vnd hintz seinem gotshaus noch hintz ir læwten vnd gu^ot, weder mit gaistleichem rechten noch mit werltleichem, vmb alle di schuld vnd ansprach, die sich ergangen habent vntz auf disen heutigen tag. Ich vergich auch mer, daz mir der oben genant abbt vnd sein conuentt dhainer ablegu^ong noch behuldigung gein der herscheft noch gein dem gericht noch hintz lant noch hintz læwten nicht gebunden noch schuldig sind. Dar vber ze vrchu^ond vnd ze einer gantzzen stætigung gib ich vorgenanter Ru^oprecht dem genantem abbt vnd dem gotshaus ze Raitenhaslach disen brief mit meinem anhangendem insigel vnd ze einer merern sicherait mit der erbern herren insigeln herm Frid(reichen) von Torring vnd seines sv^ons herm Seyfrides, Perichtols meines vettern dez Imtzinger vnd der erbern purger von Purchausen Frid(reichen) von Insprukk vnd Perchtolts des Zinkken insigeln, di si dar an gelegt habent durch meiner gebet willen in an allen schaden, wand si der vorgeschriben sache vertaidinger vnd verrichter gewesen sind zwischen dez genanten abbts vnd dez conuents ze Raitenhaslach vnd mein, vnd verpind auch mich mit meinen triwen vnder dew insigel an alles gevær allez daz stæt ze haben, daz oben verschriben ist. Der brief ist gegeben nach Christes gebu^ortt vber dreutzehen hundert jar dar nach in dem drew vnd viertzigistem jar, an der ainlef tausent mayd tag.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 720, S. 617-618