Ich Wernhart der Visler vnd mein hausfraw^oe Agnes verjehen offenbar an disem brief allen den, di in sehent oder ho^ernt | lesen, daz vns der wirdig abbt Vlr(eich) vnd di sammu^ong ze Raitenhaslach habent lazzen ir aygen gu^ot ze Stainpu^ohel^a ze paw^omans recht vnd alles, daz dar zv^e geho^ert, besu^ocht vnd vnbesu^ocht, zv^e vnser bayder leiben vnd nicht lenger, vnd su^ellen auch in da von, di weil wir baydew leben, weder stewer noch dienst geben. Wir sullen auch irer vischswaid, di si ze Mosuogel habent, ir pfleger sein zv^e vnser bayder leiben; vnd swenn wir baydew nicht mer sein, so sol dhain vnser eribe nach dem genanten gut ze Stainpu^ohel^a oder nach der vis chswayd dhain red oder ansprach nicht mer haben, wan ez dem genantem gotshaus danne leydich vnd vrey^e ist sam ander ir vreyes aygen. Ez sol auch daz genantt gu^ot ze Stainpu^ochel^a nach vnserm tod dem gotshaus geantw^ort werden, daz es stiftleich vnd pæwleich lig ze haus vnd ze veld. Dar v^ober gib ich genanter Wernhart Visler dem gotshaus ze Raitenhaslach disen brief ze vrchu^ond mit meinem anhangendem insigel. Der ist geben nach Christes gebu^orrt vber dreutzzehen hundert jar dar nach in dem drev vnd viertzzigistem jar, an sand Marteins abent.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 721, S. 618-619