Ich Jacob der Phanshueter, purger ze Chrems, vnd ich Margret sein hausvrowe vnd vnser payder erbn | wi^er verjechen offenbar mit disem brief allen den, di in schechent oder horent lesen, daz wi^er mit woll verdachtem muet vnd mit gesampter hant vnd mit gu^enst vnd guetleichem willen aller vnser erbn vnd auch nach rat vnser pesten freunt recht vnd redleich ze chauffen haben gebn dem erbern mann Perchtolten dem Czinken, purger ze Pv^erchausen, vnd sein erbn vnsern weingarten, der da leyt an dem obern Lintperg ze naest Jansen weingarten des Schreiber svn von Minpach, des ein jeuch ist, vmb scheczig pfunt phening Wienner mvncz, der wi^er gancz vnd gar gewert sein ze rechten taegn vnd deu si auch hincz den juden fu^er vns habent gebn. Vnd haben in den egenanten weingarten auf gebn ledig vnd vnuerchvmbert mit des perchmaisters hant hern Hainreichs des Chra^eutwu^erems, di zeit sluzzler ze Chrems an des herczogen hof, dem man da von geyt ze pu^erchrecht an sand Michels tag zehen phening vnd nicht mer, der auch des egenanten weingarten di zeit styffter vnd storrer ist gewesen. Vnd haben yn den weingarten auf gebn mit allen den nuczen vnd rechten, vnd wi^er in pv^erchrechts nucz vnd gewer vnuersprochenleich her haben gehabt vnd pracht. Seu mugen auch fu^erbaz hin fu^er ewichleich mit dem offt genanten weingarten oder swer den prief an i^er stat in hat allen irren frvmen schaffen an alle i^errung mit verseczen vnd mit verchauffen juden vnd christen vnd geben, swem seu wellent, so yn daz aller pest chvmt vnd fuegt. Wi^er schullen auch des egenanten weingarten i^er rechter scherem sein fu^er alle ansprach, allez pu^ercrechtes^a recht ist vnd gewonhait des landes ze Osterreich, vnd auch fu^er alle vnser erbn, seu sein vogpær oder vngevopær, seu sein in der lancz oder auzzer landes. Vnd waz seu des scherms schaden næm hincz jvden oder hincz christen oder wie ein rechter schad genant wær, den i^er ains vngesworen pey sein trewen gesagen mag, den schullen wi^er in ab tu^en an fv^erbot vnd an chlag gancz vnd gar. Vnd daz schullen seu haben auf vns vnd auf alle die vnd wi^er haben in dem lande ze Osterreich oder swo wi^er icht haben auf land vnd auf wazzer vnd auch auf vnsern trewen. Vnd daz in vnd auch vns di red fu^erbaz stæt vnd vnczebrochen peleyb, des gebn wi^er in disen brief zv einem offen v^erchund vnd waren zeugen diser sache versigelten mit meins êegenanten Jacobs insigell vnd auch mit des vorgenanten perchmaisters insigell vnd auch du^erch pesser staetichait willen haben wi^er gepeten den erbern mann hern Pettern, di zeit stat richter vnd juden richter ze Chrems, daz er sein insigell zv einem zeug diser an disen prief gehangen hat ym an schaden. Der prief ist gebn nach dreuczehn hvndert jaren von Christi gepu^erd darnach in dem acht vnd vierczkistem jar ze phingsten.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 735, S. 632-633