Wir Margret von gotes genad Romischev kayserinn * enbieten vnsern pflegern, richtern vnd gemain I chleich allen vnsern amptlau^oten, wa di gesezzen sint in vnser herschaft, di ietzu^ond sint oder furbaz werdent, vnser huld vnd alles gu^ot. Wir lazzen euch wizzen, das wir vnser lieb diemu^otig * abbt Vlr(eich) vnd den conuentt ze Raitenhaslach in vnsern besundern schi^erm vnd genad genomen haben, also daz wir in alle die hantfest, die si von vnserm lieben herren kayser Ludweigen saelig vnd von^a seinen vordem oder von der herschaft ze Bayern habent, si sein vber gerichtt, mautt oder zolle vnd ander sache, swi di genant sein, bestaett haben vnd bestaeten in di mit disem brief in allen den rechten, als ir hantfest sagent, di si dar vber habent, di wir gesehen vnd geho^ert haben. Wir wellen auch vnd gebieten allen vnsern amptleuten, p flegern, richtern vnd scherigen, swi si genant sint, di ietzu^ont sint oder furbaz werdent, daz si dhainerlay sache richten oder handeln hintz dez vorgenanten gotshaus ze Raitenhaslach lau^ot vnd gu^oten, swa si di habent in vnserr herschaft, daz wider ir hantfest sei, vnd auch ir hantfest verho^ern auf schranne oder anderswo, swa si dez gerent oder bedu^erffen. Vnd da von wellen vnd gebieten wir ew allen vnd i^egleichem besunder vestichleich vnd ernstleichen bei vnsern hulden vnd bei den wandeln, die ir hantfest sagent, daz ir in di selben brief vnd genad, di wir * in getan haben, stet haltend vnd in di nicht vberuart noch si mit dhainen sachen dar an irrent noch beswa^ernt, als ir vnser vngenad vermeiden wellet. Ze vrchu^ond dises briefes, der geben ist ze Mu^enichen an vnser fraw^on tag als si gebo^ern wart, nach Christes gebu^ortt dreutzehen hundert jar vnd in dem aecht vnd viertzigstem jar.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 736, S. 633-634