Universis presentes litteras inspecturis Alven de Riccardis Canonicus S. Marie de Venetiis, collector a sede apostolica constitutus super decimis terre S. subsidio deputatis et his, que ad decimas pertinent supra dictas, nec non super obventionibus et legatis aliisque utcunque provenientibus ipsi subsidio terre S. in Salzburgensi provincia et Pragensi, Olomucensi, Ehistettensi civitatibus et dicte provincie Maguntine salutem in Domino sempiternam. Noveritis, quod in nostra presentia constitutus religiosus vir Dominus Conradus prepositus Ranshovensis solvit nobis pro tertia parte totius decime, quam romane Ecclesie ratione dicte decime tenebatur, libras quinque Ratisbonensium et VI. libras Salzburgensium denariorum, quos recepisse nomine dicte romane Ecclesie confitemur. Et iuravit dictus prepositus ad sancta Dei Evangelia corporaliter tacta de proventibus et redditibus suis et Ecclesie sue pro dicta tertia parte se plene et fideliter decimasse ac pro residuo dicte decime non solute eodem modo in posterum decimare eosdem redditus et proventus et dictum residuum solvere in termino seu terminis, quem vel quos sibi ad solutionem dicti residui duximus statuendos. In cuius rei testimonium presentes litteras sibi concessimus nostri sigilli munimine roboratas. Datum apud Pataviam VII. Idus Februarii, Pontificatus Domini Martini Pape IV. Anno II.

Source Fulltext: OÖUB 4 (Wien 1867) S. 4-5, Nr. 5