Wir Ludwig von Gottes Genaden römischer Keyser, zu allen Zeiten mehrer des Reichs Bekennen und tuen kund offenbar an disem Brief, dass wir den erbarn geistlichen Leuten dem Probst und dem Convent gemainiklich des Gotzhaus zu Ranshoven unsern lieben dyemutigen durch besunder Gunst und gutn Willen, den wir zu yn haben, umb unser, unserer Vorvodern und Nachkhomen sele Hail zu andern Genaden, die wir in und irem Gotzhaus vor nemlich gethan haben, die besunder Genad aber thuen mit disem Brief, dass wir in all ir Leut und Gut, die sy von alter gehabt und hergebracht habend in dem Dorf zu Ranshoven, und auch die wir in von neuen Dingen in dem selben Dorf geben haben, als ander unser Brief sagent, die sy von uns darumb habent, von aller Pet, Steur und Voderung gefreyt haben, und freyen auch mit disem Brief für uns, unser Erben und Nachkomen. Davon wellen und gebieten wir allen unser Amtleuten, Vitzthumen, Pflegern, Richtern, Schergen und andern, wie die benant sein, die yzo sind oder fürbas werden, vestiklich bey unsern Hulden und Genaden, dass sy vorgenanten Probst und Convent und ir Nachkhomm des vorgenanten Gotzhaus an disen unsern vorgenanten Genaden schiermen und in die staett haben und nicht überfahrn in keinen Sachen, in keiner Weis. Und darüber zu Urkund geben wir in den Brief versigelten mit unsern keyserlichen Insigl, der geben ist zu Purkhausen am Mitwochen nach Gotzleichnams Tag nach Christi Geburte XIII. hundert Jar, darnach in dem fünf und vierzigisten Jar, in dem ain und dreyssigisten Jar unsers Reichs, und im achzeten des Chaysertumes.

Source Fulltext: OÖUB 6 (Wien 1972) S. 518, Nr. 514