Abschrift||
01 ICH, Jorge Wendelinge Babst, Burger zu Wachenheym Bekennen offentlichen yn diesem brieff Vnnd thün Künt allen den, die ynen yemer ansehent lesent oder horent||
02 lesen, Das ich vor mich, all myn erben vnd nachkomen recht vnd redliche verkaüfft vnd zükaüff geben han off eynen wider kauff vnd verkaüffen auch Jn Crafft||
03 dieses brieffs Den Ersamen pferrer vnnd kirchengeschworen zü wachenheym vnd iren nachkomen, Sandt KatherIn pfründe züsteen, Eyn halben gulden gelts||
04 Jerliches vmb zehen gulden güter Reinischen werunge, Der Jch, Jorge obgenant, von den genanten pferrer vnnd kirchengeschworen gare vnd gantz bezalt,||
05 der woll vernügt vnnd die Jn ander[n]n mynen notze vnd fromen gewent vnd gekert han. Diesen vorgeschribenen halben gülden gelts gereden vnd versprech||
06 Jch, Jorge obgenant, vor mich, myn erben vnd all myn nachkomen mit güten druwen vnd rechter warheit Eym besitzer der genanten pfrinden Sant KatherIn||
07 allen seynen nachkomen oder Jnhelter diß brieffs mit güetem wissen vnd willen Alle Jar ierlichen zu reichen vnd zü geben off Sant Martins tage,||
08 des heiligen bischoff, vngeuerliche vnd soll das nit hyndern[n] gebott noch verbott oder keyn ander sach die yemandt erdencken konte oder mochte ane*||
09 all geuerde. Vnnd des zü merer sicherheit han ich, Jorge obgenant, vor mich vnd all myn Erben eym besitzer der obgemelten pfründen vnnd seynen||
10 nachkomen oder Jnhelter diß brieffs, als vor steet, zü eym rechten, waren, vnüerscheyden vnderpfand geleyt vnnd legen auch mit Crafft diß brieffs Meyn||
11 hüß vnd hoff mit allem seym begriff vnd zügehorde, by der holtz pforten gelegen, neben mym brüder Hensel Wendel vnd die zwo gassen, zinßt vor||
12 der Brüderschafft Eyn ort eyns güldens, Jt[e]m eyn halben morgen wyngarts zü henehüsen, oben zu der schonfelder wege, vnden zü Albrechts Hensel, ist vorhin||
13 eygen, Jt[em] eyn virtell wyngarts Jn der krüwen hellen, zwischen Hensel Wolff vnden vnd oben neben dem almen wege, ist vorhyn eygen, Jt[em] fünff virtell||
14 ackers Jn der kruwen hellen, zwischen den zweien wegen, oben daran Lorentz Sprüssen witwe, zinßt vorhyn eyn schillinge pfennige. Mit dem bescheide,||
15 weres, das Jch, Jorge obgenant, oder myn Erben eyniches Jars sümige vnnd den vorgeschriben halben gulden gelts nit reichten vnd geben off Sant Martins tage,||
16 als vor stat, das doch nit enseyn soll, So soll vnd mage Eyn besitzer gemelter pfründen vnd seyn nachkomen vff die genant vnderpfandt wetten vnd||
17 vff holen nach gerichts recht vnd gewonheit der Statt wachenheym, DarIn yn dan eyn schültheis, der die zit ist, schüwern[n], schirmen vnd handthaben soll||
18 als Jn andern[n] der pfründen eygen güeter, So das also erwünnen vnd vffgeholt seyn. Auch sollen Jch oder myn erben die vnderpfandt yn rechtem, red-||
19 lichem buwe, Jglichem züsteet, halten vngeüerlichen; Vnnd wo wir sümniß daran theten, sollen wir bessern[n] zü eyner iglichen zit nach erkentniß Erber lüte,||
20 die von eym schulthesen dartzü gegeben werden, So dick das nott geschicht. Auch weres, das mehe oder hernach mehe zinß vff den obgenanten vnderpfan-||
21 den funden wurden oder stunden anderst, dann hieüor benent ist, was kostens oder schadens Eyn besitzer gemelter pfründen neme, Sollen ich oder myn erben||
22 naher vnd abthun one schaden Eyns yeden besitzer gemelter pfründen. Vnnd herwider vnd alles vor oder nach geschriben steet, sollent Jch oder meyn||
23 Erben vns nit behelfen mit eynichen fünden sachen oder wegen, die herdacht vnd fünden mogen werden, Die eym besitzer gemelter pfründen vnd seynen||
24 nachkomen vnd mir oder mynen Erben gefromen mochte. Aüch ist bereth, weliches Jars ich oder myn erben komen xiiii tage vor Sant Jorgen tage,||
25 des heiligen Ritters vnd mertelers, vnd bringen samenthafft zehen gülden, güte von golde, an müntze vnd schwere genüge von gewicht, die dan zür||
26 genge vnd geneme seint, vnd geben die den obgenanten pferrer vnd kirchen geschworen oder Jnhelter diß brieffs mit Jrem güeten wissen vnd willenn,||
27 als vor steet, Die sollent sie also von vns nemen vnd diesen brieff wieder zu vnsern[n] handen stellen, Der alßdan crafftlose, vnmechtige vnd dot seyn||
28 soll, doch also, das all geüallen gülten vnd, ob des eyn besitzer gemelter pfründen eynichen kosten oder schaden genomen heth, gantz vnd alzümale||
29 bezalt, vßgericht vnd das vnderpfandt icht vff geholt sy, als vor steet. Vnnd des zü noch merer sicherheit han Jch, Jorge Wendelinge abgenant, die||
30 Ersamen weisen Bürgermeister vnd Ratt der statt wachenheym flissigklichen gebethen, Das sie die vorgenanten vnderpfandt vor sich nemen vnnd||
31 erkennen, ob der vorgeschriben halb gülden gelts damit woll verlegt sie vnnd der vorgenanten statt Jngesiegell thün hencken an diesen brieff,||
32 mich vnd myn Erben zübesagen aller vorgeschribener dinge. Des wir, Bürgermeister vnd Ratt ytzünt genent, Bekennen, das wir das vorgenant||
33 vnderpfant vor uns genomen vnnd nach dem er vns gesagt hatt erkent haben, Das der vorgeschriben halb gülden gelts damit zü dieser zit||
34 woll verlegt ist vnnd der vorgenanten Statt wachenheym Jngesiegell haben thün hencken an diesen brieff, ynen vnd seyn erben zübesagen||
35 aller vorgeschribener dinge vnd vns, das wir also herüber geweist vnnd erkent haben. Geben off dinstage nach dem Sontage Halb fasten||
36 Anno Dominj fünffzehenhündert zwolff.

Source Fulltext: Rita Lützenkirchen, Friedelsheim, und Wiltrud Hutchison, Wachenheim, ehrenamtliche Tätigkeit. Geprüft, überarbeitet und kommentiert von Andreas Kuhn M. A., Neustadt/Weinstraße